O conselleiro de Cultura destaca un investimento dun millón de euros para a ampliación de centros educativos en Santiago

Román Rodríguez en Santiago. Foto: X. Crespo

O conselleiro de Cultura, Educación e Ordenación Universitaria, Román Rodríguez, anunciou hoxe que o seu departamento ten previsto investir 650.000 euros na ampliación do CEIP de Roxos. Fíxoo durante unha visita ao CEIP Plurilingüe Monte dos Postes, onde puido comprobar o avance dos traballos de ampliación que se están a realizar no centro, que contan cun orzamento de máis de 300.000 euros.

O conselleiro salientou que as actuacións en ambos os centros demostran que o departamento educativo da Xunta de Galicia está a dar resposta á necesidade de creación de prazas de escolarización en zonas nas que a demografía así o demanda. Neste sentido lembrou que a Consellería acaba de comprometerse no Parlamento a desenvolve un plan de renovación e mellora de infraestruturas e equipamentos para atender – entre outras- a necesidades deste tipo, que suporá un investimento de preto de 18,4 millóns de euros.

Nesta visita – e na que realizou posteriormente ao propio CEIP de Roxos- o conselleiro estivo acompañado polo alcalde de Santiago, Agustín Hernández; polo secretario xeral técnico da Consellería, Jesús Oitavén; polo xefe territorial do seu departamento na provincia, Indalecio Cabana; e polos directores do Monte dos Postes, Manuel Brenlla; e do CEIP de Roxos, Eva García; entre outras autoridades.

Ampliación en Roxos

As obras no CEIP de Roxos consistirán na construción dun novo volume de máis de 530 metros cadrados que albergará 3 aulas de infantil, un espazo dedicado a apoio educativo, aula de psicomotricidade, aseos, despachos, conserxería e zonas comúns. O obxectivo é executar este mesmo ano as obras. O inicio das mesmas está previsto contra o verán, co fin de evitar as molestias á comunidade educativa.

Esta actuación súmase ás melloras realizadas no centro nos últimos anos, en concreto para a construción dun aseo, reforma eléctrica e instalación dun novo portal de acceso. O colexio recibe ademais achegas para apoiar o funcionamento da súa biblioteca e foi dotado con 50 ordenadores ultraportátiles ao abeiro do Proxecto Abalar, de tal forma que o investimento total da Consellería para obras e implantación de programas novidosos desde 2009 ascende – incluíndo a ampliación prevista- a máis de 708.000 euros.

Avance das obras no Monte dos Postes

No transcurso da súa visita ao CEIP Plurilingüe Monte dos Postes o conselleiro puido comprobar o avance das obras de ampliación que se están a realizar no centro cun orzamento de preto de 310.000 euros. A actuación consiste na construción dun volume anexo de 2 plantas con 2 aulas, aseos, espazo polivalente e almacén. Ademais proxectouse a instalación dun ascensor para contribuír á mellora da accesibilidade do centro.

Con esta actuación a Consellería confirma o seu compromiso cun centro no que nos últimos anos xa se acondicionaron espazos para a prestación do servizo de comedor escolar, e que – na súa condición de plurilingüe- conta ademais cun auxiliar de conversa nativo de EEUU. Deste xeito, o investimento desde 2009 ascende – incluída a ampliación en execución- a máis de 485.000 euros.