O alcalde de Santiago celebra que se restitúa a honra dos edís absolvidos

O alcalde de Santiago, Agustín Hernández, expresou este venres a súa “alegría” pola absolución dos sete exedís do PP compostelano que foron inhabilitados por aprobar o pagamento da defensa doutro concelleiro imputado na ‘Operación Pokémon’ e esperou que agora “se lles restitúa a súa honra”. Neste sentido, esixiu á oposición que “como mínimo” poña “o mesmo empeño en pedir perdón” que o que dedicou a criticalos.

En rolda de prensa, preguntado sobre se contará con eles na súa candidatura para os comicios de maio, rexeitou falar de “persoas” e remitiu ao día 15 de abril, cando se fará pública a lista. “Eu falo de programa, falo de cidade, non falo de persoas”, resolveu. Con todo, o rexedor popular reflexionou acerca de que el aposta por que “se pase páxina” no Concello, toda vez que “o pasado pasou”.

Ademais, interpelado sobre as declaracións do presidente da Xunta e do PP galego, Alberto Núñez Feijóo -quen dixo este venres que a decisión depende de Hernández- Hernández reivindicou que, no seu momento, “ninguén” lle puxo “ningún condicionante”, para deixar claro que seguirá sendo así mentres siga á fronte da casa do concello da capital galega.

En primeiro lugar, na súa resposta sobre este asunto, Agustín Hernández, que tomou o bastón de mando tras a inhabilitación dos sete exedís, manifestou a súa “alegría” por “eles” e as súas “familias”. “Nunca compartimos o contido da sentenza, pero o PP respectouna e tomou decisións extraordinarias, actuando con responsabilidade para garantir a gobernabilidade do Concello,” recordou.

FOI UN “ATROPELO”

Neste sentido, destacou que a el lle parecía un fallo “inxusto” – que máis adiante chegou a cualificar de “atropelo” – e, pro este sentido, resaltou que a absolución por parte da Audiencia Provincial “agora demostra a inxustiza” que se levou a cabo “con estas persoas”, e que o afectou “gravemente” ás súas vidas e á súa “honra”, cando non cometeran “delito” ningún.

“Espero que todos aqueles que aproveitaron aquel momento para vilipendiar, dediquen como mínimo o mesmo empeño en pedir perdón”, subliñou.

A continuación, Hernández, cuestionado sobre se os incorporará na lista para o 24 de maio, a todos ou a algún, defendeu falar de “programa” e “cidade”, pero non de nomes, aínda que recoñeceu que “onte -por este xoves- cambiou algo”. “Ata onte, había sete persoas que non podían ocupar un posto por imposición legal. Hoxe esa circunstancia inxusta non está”, dixo, para agregar que nestes momentos os exconcelleiros están “nas mesmas condicións que calquera outra persoa” que queira formar parte da candidatura popular en Santiago.

Ante a insistencia da prensa, o rexedor limitouse a indicar que nin confirma nin desmente “que vaia ir unha ou outra persoa” na súa candidatura. Así, ratificou que falou con eles para darlles “felicitacións” e dicirlles “que gozasen do momento”, pero evitou responder explicitamente a se contará con eles.

“O PASADO PASOU”

Con todo, engadiu unha “reflexión” en referencia a que espera “que aos afectados se lles restitúa a súa honra” e que avoga por que se pase páxina” porque “o pasado pasou”. O alcalde e toda a corporación, segundo chamou a atención, están “centrados no presente” e no “futuro”, despois de “recuperar a normalidade política” na cidade tras recuperarse “a normalidade institucional” previamente.

AOS líderes de PSOE e BNG -antes de que estes comparecesen en rolda de prensa este venres- atribuíulles unhas declaracións iniciais, en valoración da absolución, “lamentables, polo que lles esixiu, polo menos, “que deixen de enredar”.

XUNTA DE GOBIERNO

Hernández comparecía para dar conta dos temas abordados na xunta de goberno. En concreto, un convenio con Vodafone para realizar unha experiencia piloto sobre residuos, as bases para autorizar venda ambulante en Salgueiriños e novos autobuses para o municipio.

En cuarto lugar, tamén se adxudicou, por 15,22 euros por hora de atención, o servizo de axuda ao fogar, que conta cun presuposto de máis de 1,8 millóns para os anos 2015, 16 e 17, segundo explicou.