Incorpóranse catro hospitais á rede que dá cobertura aos futbolistas galegos

Dende este domingo 15 de marzo catro novos hospitais incorporáronse á rede que dá cobertura aos futbolistas galegos, no marco da súa mutualidade, de modo que elevan a seis o total de centros, aos que se suman outras 16 clínicas distribuídas por toda a comunidade.

En concreto, ao Hospital Miguel Domínguez en Pontevedra e Nuestra Señora de Fátima en Vigo únense agora La Rosaleda en Santiago, Quirón en A Coruña, Polusa en Lugo e El Carmen en Ourense.

O presidente da Federación Galega de Fútbol, Rafael Louzán, tamén á fronte da Deputación de Pontevedra e do PP desta provincia, reivindicou este luns que en “dous meses intensos de traballo” a nova directiva da asociación logrou “resolver un problema moi grave”, que era o relacionado coa mutualidade para estes deportistas e as garantías para a súa saúde, que se fixaron como “prioridade”.

Nunha comparecencia ante os xornalistas nun hotel da capital galega, Louzán avanzou, ademais, que está “a punto” de poder anunciar novidades para as bisbarras da Mariña, O Barco de Valdeorras, Verín e A Costa da Morte, en relación a un acordo co Servizo Galego de Saúde (Sergas) para a “atención preferente” nas súas dependencias.

Con este fin, o máximo representante da Federación Galega de Fútbol sinalou que se mantiveron xa tres reunións coa Consellería de Sanidade, posto que é “de xustiza” que os deportistas destas zonas non teñan que desprazarse varias decenas de quilómetros para poder ser atendidos.

PROBLEMÁTICA

“Non foi unha negociación nada doada, pero finalmente logrouse o acordo”, resaltou Rafael Louzán sobre o pacto alcanzado con Adeslas.

O pasado outubro, os centros hospitalarios que forman parte da Asociación de Hospitais privados de Galicia (Ahosgal) acordaran deixar de prestar asistencia sanitaria aos deportistas afiliados á Federación Galega de Fútbol, ao atribuír a esta entidade a negativa a asinar un acordo marco que establecía os protocolos para garantir unha asistencia “de calidade” aos lesionados.

REUNIÓNS CON BÁÑEZ E SÁENZ DE SANTAMARÍA

Na rolda de prensa deste luns, previa a unha comida con medios de comunicación, Rafael Louzán tamén deu a coñecer senllas entrevistas celebradas coa ministra de Empleo, Fátima Báñez; e a vicepresidenta do Goberno, Soraya Sáenz de Santamaría, para abordar cuestións relativas ás obrigas dos clubs con Facenda e sobre Seguridade Social e os voluntarios que desempeñan labores no ámbito do fútbol.

Neste último campo, segundo apuntou, “nunca houbo unha regulación”, polo que nestes momentos espera que o Goberno presidido por Mariano Rajoy poida xerar un “marco” que sexa “esperanzador” e sensible ao labor de carácter “social” que rodea ao mundo da práctica deportiva.

FEDERACIÓN ESPAÑOLA DE FÚTBOL

Por outra banda, Louzán indicou que nas catro ocasións nas que acudiu a Madrid como responsable da federación galega de fútbol pediu “sensibilidade e colaboración” á federación española. “E atopeina”, subliñou antes de referirse a dúas cuestións que van requirir un maior financiamento en Galicia.

En primeiro lugar, confiou que en “poucas semanas” se poida culminar o campo de fútbol de Coia, en Vigo, cunha inversión prevista que rolda os 1,5 millóns e ao que solo lle falta a construción dun muro e a adecuación dos baixos para dar cabida a unha cafetaría e locais anexos.

En segundo termo, apuntou ao proxecto de realización de dous campos de herba sintética na Coruña, con 2,4 millóns de inversión e aspectos pendentes nos que se negocia coa empresa e a dirección da obra.

SEDE DA FEDERACIÓN GALEGA

Relacionado con isto, Rafael Louzán criticou o comportamento da anterior directiva da Federación Galega de Fútbol, que “un día antes” de convocar eleccións adxudicou a sede da federación por 2 millóns de euros.

Segundo relatou, pola información que lle “consta”, nun primeiro proceso fíxose un convite a empresas das que unha resultou adxudicataria. Non obstante, a solicitude dun aval do 20% en lugar do 5% frustrou as expectativas da compañía, que agora interpuxo unha demanda “por danos e prexuízos”, circunstancia que estudan os equipos xurídicos da federación.

A continuación, fixo referencia ao empréstito de 2 millóns cunha entidade bancaria, do que en breve a organización terá que aboar unha cantidade mensual de 35.000 euros.

Neste escenario, Louzán considerou “indubidable” que hai que construír ou buscar unha nova sede”, pero mostrouse partidario, polo momento, de esperar a “que se aclare esta situación”, para dilucidar se convén ou non continuar co proceso.

AMAÑOS E FÚTBOL FEMININO

Preguntado por outro tema, o relacionado con amaño de partidos, o tamén presidente do organismo provincial pontevedrés opinou que “estas cousas nunca deben suceder”, aínda que desvinculou a Galicia desta forma de proceder.

Por último, sobre o fútbol feminino e o marco que regula as competicións, avogou por buscar unha “regulación mellor” que beneficie aos clubs, de modo que cada ano se saiba quen baixa e quen sobe, por exemplo.

Para iso, indicou que en “dous ou tres meses” se poderá presentar unha iniciativa que malia ter a tempada 2015-2016 “moi enriba” si servirá por completo á correspondente aos anos 2016-2017.