Imputan a un conductor de Tui por triplicar a velocidade e outro de Pontevedra que duplicou o límite

O Subsector de Tráfico da Garda Civil de Pontevedra imputou a A.P.V., de 34 anos de idade e veciño de Tui e a A.G.R., de 49 anos de idade e con domicilio en Pontevedra, como supostos autores de dous delitos contra a seguridade vial, exceso de velocidade.

O pasado fin de semana, no km. 155,4 da N-550, termo municipal de Mos, un equipo de radar do referido Subsector, detectou a circulación do turismo marca AUDI á velocidade de 145 km/hora, estando limitada, no devandito punto por existencia de vivendas anexas e outras circunstancias, a 50 km/hora.

A patrulla, que prestaba apoio ao operador do radar, parou o devandito turismo identificando o seu condutor (A.P.V.).

Por todo iso e dado que o exceso de velocidade supón un feito penal, procedeuse á instrución das correspondentes dilixencias remitidas ao Xulgado de Instrución número DOUS do Porriño, onde comparecerá o imputado para a celebración dun xuízo rápido.

Tamén a pasada semana, un vehículo radar do citado Subsector situado no km. 288,4 da A-52, termo municipal de Ponteareas, detectou a circulación dun furgón, mara RENAULT, á velocidade de 181 km/hora.

Dado que o operador traballaba sen equipo de notificadores non puido ser controlado o vehículo, polo que se iniciaron as correspondentes investigacións para identificar o condutor, as cales deron resultado positivo no día de onte, procedéndose á imputación de A.G.R., como autor de dito ilícito xa que este tipo de vehículo ten limitada a súa velocidade máxima en autovía a 90 km/hora.

As dilixencias instruídas foron remitidas ao Xulgado de Instrución de Garda de Ponteareas, onde terá que presentarse o imputado cando para iso sexa requirido.