Feijóo afirma que a absolución dos edís de Santiago o reconcilia co Dereito

O presidente da Xunta, Alberto Núñez Feijóo, asegurou que a absolución dos sete edís de Santiago condenados por prevaricación lle “reconcilia co Dereito” que aprendeu na súa etapa universitaria, aínda que rexeitou pronunciarse sobre a posibilidade de que sexan incluídos nas listas do PP para as eleccións locais e poidan regresar á casa do concello compostelano.

En declaracións aos medios tras participar nun acto en Santiago, Núñez Feijóo asegurou que a sentenza da Audiencia Provincial de A Coruña que absolve os sete edís demostra que “o tempo pon as cousas” no seu sitio” e confiou en que “entre todos” poida rehabilitarse a imaxe “deteriorada” de Santiago.

“A mi reconcíliame co Dereito que aprendín na Facultade de Dereito, onde para cometer un delito de prevaricación hai que ter ‘animus’ e actuar a conciencia,” sinalou o presidente galego, para quen a sentenza da Audiencia demostra que os edís non tiñan “ánimo de prevaricar” cando aprobaron nunha Xunta de Goberno pagar a defensa doutro concelleiro imputado na Operación Pokémon.

Alberto Núñez Feijóo confiou en que, con esta sentenza, todos tomen “nota” e se poida “proseguir coa política e intentar facer as cousas ben”. “¿Hai cousas que se fan mal en política? si, sen dúbida, ¿Hai cousas que se teñen que perseguir?, sen dúbida”, explicou o xefe do Executivo galego, ao tempo que criticou que haxa outras “cousas que non se fan mal” e “asimilen aquelas que hai que expulsar da vida política”.

“Santiago non tivo un goberno que prevaricou”, resolveu o tamén presidente do PPdeG, que cualificou de “extraordinario” que a absolución “recompoña a honra” destes concelleiros. “É simplemente facer xustiza”, ratificou.

POSIBLE INCORPORACIÓN ÁS LISTAS

Non obstante, Alberto Núñez Feijóo rexeitou pronunciarse sobre a posibilidade de que estes edís, que dimitiron tras ser inhabilitados pola sentenza, poidan reincorporarse ás listas do PP para as eleccións municipais de maio. Sobre esta cuestión, remitiu a decisión ao PP local e ao candidato e actual alcalde, Agustín Hernández.

Nesta liña, Feijóo recordou que son o cabeza de lista e o PP de Santiago os que “teñen a capacidade para integrar e para incorporar ás listas aqueles compañeiros que consideren oportuno” e asegurou que “confía plenamente” na súa decisión.

“Non son a persoa adecuada para pronunciarme ao respecto nin teño capacidade para decidir, confío plenamente no que decida o alcalde de santiago igual que confiaba plenamente en que os compañeiros non cometeran un delito de prevaricación”, sentenciou.