Empresas do sector residuos de Galicia debaterán en Santiago sobre os SANDACH

A Asociación Profesional de Empresas Ambientais de Galicia (APROEMA) organizará o próximo 25 de marzo en Santiago de Compostela a Xornada “Os SANDACH e a Xestión de Residuos”.  A palabra Sandach é un acrónimo utilizado para referirse aos “Subproductos Animais Non Destinados Ao Consumo Humano”, con esta Xornada preténdese informar aos xestores de residuos Sandach cal é o procedemento e como afecta as empresas do sector da xestión de residuos.
 
A finais do 2014 entro en vigor o Real Decreto 476/2014, de 13 de xuño, polo que se regula o rexistro nacional de movementos de subproductos animais e produtos derivados non destinados ao consumo humano, ten por obxecto a identificación e o rexistro informático alternativo de todos os movementos de subproductos animais e produtos derivados non destinados a consumo humano que realicen dentro de España, desde a súa orixe ata os lugares nos que se produce o seu uso final ou eliminación, co fin de garantir a trazabilidade dos SANDACH.
 
Con este rexistro poderán cruzarse e comprobarse os datos declarados por cada operador implicado nun movemento e desta forma detectar de maneira rápida posibles irregularidades nos destinos e usos de material SANDACH.

O encontro terá lugar de 10 a 14 horas na sede da Confederación de Empresarios de Galicia (aforamento limitado, previa inscrición até o 20/03). Para iso, APROEMA conta coa colaboración de Dirección Xeral de Produción Agropecuaria, Consellería do Medio Rural e  a Dirección Xeral de Calidade e Avaliación Ambiental da Consellería de Medio Ambiente, Territorio e Infraestruturas.