Eli ‘Paperboy’ Reed chega a Santiago onde ofrecerá o único concerto en Galicia

Eli ‘Paperboy’ Reed

Eli ‘Paperboy’ Reed, referencia do panorama actual do soul, chegará a Santiago este domingo, 8 de marzo, para ofrecer o único concerto en Galicia da súa xira especial ‘Walkin’ & Talkin’ 10 th Anniversary Tour’, unha cita que permitirá aos seguidores do norteamericano regresar ás orixes do son auténtico que o converteu en estrela.

Fai algo máis de dez anos, en 2004, o veinteañero Eli ‘Paperboy’ Reed encerrouse con dous amigos nun soto-estudio de Boston cun único plan: gravar esa combinación de downhome blue, rhythm&blues e soul, que ensaiaran e tocaran en distintos clubs da cidade.

O resultado foron 17 cancións gravadas en directo en oito pistas. Unha ducia de aqueles temas remataron por converterse no primeiro disco, ‘Eli Paperboy Reed Sings Walkin’and Talking (for my baby) and Other Smash Hits’.

O verán seguinte, con axuda dun empréstito dos seus pais, ‘Paperboy’ fabricou mil copias en CD que vendía en concertos e tocando en Harvard Square, na rúa, cunha gorra no chan.

Na actualidade, Reed é agora unha das estrelas do circuíto soul, con tres traballos máis, singles e centos de concertos por todo o mundo. Coincidindo co aniversario dese primeiro disco ‘case caseiro’, Eli ‘Paperboy’ decidiu recuperar esa idea da ‘maxia’ vivida no soto e o xeito simple de facer as cousas.

CONCERTO EN SALA CAPITOL

O artista norteamericano parará en oito cidades de toda España e Santiago de Compostela será a única de toda Galicia, o concerto, incluído no ciclo Sons’15, terá lugar o domingo, na Sala Capitol, a partir das 19,30 horas.

As entradas custan 17 euros (máis gastos) se se compra de forma anticipada e 21 en taquilla. A venda anticipada pódese facer a través de salacapitol.com, ticketea.com, ou nos portelos do teatro Principal, A Reixa e M!randa.