Clausúrase na Lama o obradoiro de emprego “Conca do río Verdugo-Oitavén”

Clausura do obradoiro

O delegado territorial da Xunta en Pontevedra, José Manuel Cores Tourís, presidiu esta mañá a clausura do obradoiro de emprego “Conca do Río Verdugo-Oitavén”, acompañado do alcalde da Lama, Jorge Canda, do alcalde de Ponte Caldelas, Perfecto Rodríguez, así como do alcalde de Fornelos de Montes, Emiliano Lage.

O obradoiro tivo unha duración de seis meses e no mesmo a Xunta investiu 177.000 euros, “que xunto a aportación económica do concello para material e equipamento chegarán ata case os 200.000 euros”, segundo explicou Cores Tourís. O obxectivo destes cursos foi preparar a 20 alumnos, aos que débese sumar o persoal contratado para dar formación en Atención Sociosanitaria a Persoas no Domicilio e en Forestal-Xardinería: un director, una titora, unha administrativa e tres monitores.

As persoas desempregadas participantes como alumnado traballador percibiron o Salario Mínimo Interprofesional, 641,40 euros ao mes durante os meses que duraron estes proxectos. En Atención Sociosanitaria a Persoas no Domicilio formáronse 7 alumnos e en Forestal-Xardinería outros 13.

Deste xeito, os participantes neste obradoiro de emprego recibiron hoxe os seus certificados de profesionalidade que teñen validez en todo o territorio nacional e que demostran a preparación e habilidades adquiridas, o que vai “incrementar moi significativamente” a súa empregabilidade, manifestou Cores Tourís, quen aproveitou a visita ao obradoiro da Lama para destacar o “manifesto claro de colaboración institucional da Xunta coas entidades locais para intentar que o obradoiros de emprego teñan continuidade na creación de postos de traballo no futuro”.

O alumnado traballou durante os pasados meses nos concellos da Lama, Fornelos de Montes e Ponte Caldelas, de onde procedían as persoas que se formaron no obradoiro que hoxe remata. Así, deron servizo de atención sociosanitaria a persoas residentes no concello de Fornelos de Montes no seu domicilo. Ademais, tamén levaron a cabo o mantemento e mellora de zonas verdes do concello de Ponte Caldelas e da ruta de sendeirismo “Tralos pasos do río Xesta” da Lama.

No municipio de Ponte Caldelas, en concreto, levaronse a cabo labores de mantemento do complexo deportivo Chan de Barcia, os xardíns de Xerardo Carballal Morgade, a praza de Frai Antonio Orge, o paseo do Río, o parque do paseo Manuel Cordo Boullosa e a urbanización do edificio Sol. No caso da Lama, a maiores, tamén se acondicionou a carballeira de Os Prados e se repoboou o polígono industrial de Racelo.

O delegado territorial recordou que obradoiros como o de a Conca do río Verdugo-Oitavén desenvolvéronse durante estes pasados meses en varios concellos da provincia de Pontevedra cun investimento que superou os 2,5 millóns de euros. “En concreto, na provincia beneficiáronse 242 persoas en 12 obradoiros de 22 concellos que puideron contar cun emprego nun momento de crise tan tremendo como o que estamos a vivir”.

En toda Galicia, a Consellería de Traballo e Benestar puxo o ano pasado en marcha un total de 53 obradoiros, que contaron cun investimento de preto de 10 millóns de euros e un número total de participantes que roldou os 1.300.

“Dende a administración autonómica somos conscientes da importancia da formación á hora de mellorar as posibilidades da busca de emprego, polo que seguiremos a apostar por este tipo de iniciativas”, rematou Cores Tourís.

Segundo apuntou tamén o delegado territorial, a nova orde destinada a posta en marcha de obradoiros de emprego resolverase a próxima semana e destinará en Galicia 10 millóns de euros para obradoiros de emprego como os postos en marcha ata o momento, así como outros 6 millóns para obradoiros de mocidade. “Na provincia de Pontevedra presentáronse 25 solicitudes para obradoiros de emprego aos que optan 45 concellos, moitos deles agrupados. En canto aos obradoiros para menores de 25, presentáronse 16 solicitudes que aglutinan a 25 concellos”, rematou Cores Tourís.