Caballero nega o pleno sobre o suposto ‘enchufe’ da cuñada de Silva

O pleno extraordinario solicitado polo PP de Vigo para que o alcalde, Abel Caballero, dese explicacións acerca da imputación de tres funcionarios e da cuñada de Carmela Silva por un suposto caso de ‘enchufismo’, non se celebrará finalmente, despois de que o secretario municipal emitise un informe contrario a esa convocatoria.

Este martes finalizaba o prazo legal que tiña o rexedor para convocar, se procedese, o pleno solicitado polos edís populares. A última hora da mañá deste martes, comunicouse ao grupo municipal do PP que ese pleno non se celebrará, baseándose nun informe do secretario, quen alega que o goberno municipal non pode esixir “responsabilidades” pola imputación de tres funcionarios (tal e como pedía o PP na súa solicitude) porque “non existen responsabilidades que se poidan esixir”.

Así, o secretario recorda que hai un procedemento xudicial aberto, no marco do cal se citou 4 persoas como imputadas (entre elas, o actual e o anterior interventor, e un xefe de servizo na área de Emprego). Segundo apunta, “nada, absolutamente nada, pode facer o goberno local -salvo colaborar coa Xustiza- para evitar un escenario de instrución nunhas dilixencias previas”, e mesmo o PP, coa súa solicitude, podería incorrer nun “exercicio abusivo do dereito”.

A ese respecto, o informe reflicte que a petición do PP é “instar o goberno municipal a que adopte as medidas oportunas para esixir as responsabilidades a quen provocase esta situación”, o que é “unha proposta de contido imposible material e xurídico, pois o feito de que tales funcionarios interviñesen na tramitación duns expedientes administrativos que son obxecto de investigación, e haxan citados a declarar como imputados (…) non xera responsabilidade de ningún tipo”.

“INDEFENSIÓN E PREXUÍZO A TERCEIROS”

O secretario abunda en que a petición do pleno extraordinario “insta ao goberno á adopción dunhas medidas de contido e realización imposible ao estar desprovistas de calquera lóxica e fundamento xurídico”, para as que, ademais, “o goberno carece de competencia material”. Por iso, insiste, un acordo nese sentido sería “nulo de pleno dereito”.

Con estes argumentos, ante a posibilidade de adoptar “un acordo contrario a dereito” e “ante o escenario dun debate en sesión pública inútil e inquisitivo, con indefensión e prexuízo a terceiros”, o secretario conclúe que o alcalde debe ditar resolución rexeitando a devandita convocatoria.