A tenente de alcalde de Vigo alude ao escándalo de supostos enchufes na Coruña

A tenente de alcalde do Concello de Vigo, Carmela Silva, referiuse este martes ao “grande escándalo” dos supostos ‘enchufes’ investigados pola xuíza Pilar de Lara, quen indaga sobre a posible implicación do alcalde da Coruña, en resposta ás preguntas dos xornalistas sobre a imputación da súa cuñada no marco dunha investigación, tamén sobre supostos ‘enchufes’, en Vigo.

Hai varias semanas, durante a celebración dun pleno, Silva anunciara unha querela contra membros da plataforma Xuntos, que foi a que levou á Fiscalía a denuncia que desembocou na investigación aberta polo xulgado de instrución número 7 de Vigo. O próximo 26 de marzo están citados a declarar catro imputados, o cuñado de Silva e tres altos funcionarios do Concello, en relación coa presunta contratación irregular da primeira nunha empresa que xestionaba os centros cívicos municipais.

Á pregunta de se xa formalizara a querela, Carmela Silva limitouse a afirmar que “hai unha xuíz que acaba de dicir que no Concello da Coruña hai un grande escándalo, e deberían dar explicacións, e os medios deberían recoller con toda claridade, que hai unha xuíza que di que o tenente de alcalde da Coruña cometeu un feito grave, e está convencida que o alcalde tiña coñecemento”.

“Esa é a noticia máis importante da que hai que falar hoxe en relación con estes temas. Encantaríame que a señora candidata do PP en Vigo pedise un pleno extraordinario na Coruña para que o seu alcalde dese explicacións de algo que si considero que é grave”, proclamou.

Malia a perseveranza dos xornalistas en preguntar polo caso concreto do seu familiar, e a investigación que afecta tres funcionarios municipais, Carmela Silva insistiu en remitirse ao caso da Coruña, ao tenente de alcalde coruñés “que está imputado” e ao propio rexedor herculino. “Creo que sería moi interesante que dese explicacións quen ten que dalas, porque o di unha xuíz”, concluíu.

Sobre a convocatoria do pleno extraordinario solicitado polo PP vigués para que Abel Caballero “dea explicacións” sobre ese caso de suposto ‘enchufismo’, o rexedor recoñeceu que este martes finaliza o prazo para convocalo, pero sinalou que aínda non decidiu se o fará. “Aínda estamos en prazo, agora chegarei (ao seu despacho no Concello) e verei os informes”, resolveu.