A parada de bus da Concha estrea marquesiña reciclada polos carpinteiros do obradoiro de emprego

Os usuarios do transporte público urbano con parada na Praia da Concha dispoñen dende hoxe dunha nova marquesiña na que esperar o autobús. Trátase dun traballo realizado polos alumnos do módulo de carpintería do Obradoiro de Emprego do Concello que construíron reciclando elementos e engadindo materiais novos. Os operarios do Servizo de Obras encargáronse esta mañá de retirar a caseta vella e de colocar no seu sitio a nova.

A marquesiña está construída en madeira e vidro. O elemento reciclado foi a cuberta de madeira que se quitou dunha estrutura de bloques de cemento da parada de Aralde. Alí colocouse unha marquesiña convencional e a cuberta de madeira foi rehabilitada polos alumnos do módulo de carpintería. En vista do bo resultado dos traballos, decidiuse aproveitar a cuberta para facer unha nova marquesiña con postes de madeira e paredes de vidro. Nos vindeiros días colocaranse os vinilos co logotipo do Concello.