A Fábrica acolle unha mesa redonda sobre a hepatite C e a sanidade pública en Oleiros

A Plataforma de afectados pola hepatite C e a Plataforma SOS Sanidade Pública participarán nunha mesa redonda que co nome de “Hepatite C: os recortes matan, medicación para todos e todas” vaise desenvolver no Centro Cultural A Fábrica en Perillo, o vindeiro venres 13 de marzo, ás 19:30 horas.

As mobilizacións nos últimos meses de pacientes afectados por esta enfermidade e os seus familiares conseguiron que desde o Ministerio de Sanidade se elaborase un Plan Estratégico Nacional para el Abordaje de la Hepatitis C.

Un paso moi importante pero no que aínda quedan moitas dúbidas para o seu desenvolvemento e posta en marcha real: o seu financiamento, o compromiso de que se leve a cabo en todas as comunidades autónomas por igual e o calendario de inicio de subministración dos fármacos e o seu alcance entre os pacientes.

Tal e como reza o título da mesa redonda: “Hepatite C: os recortes matan, medicación para todos e todas”, a falta de tratar as cuestións anteriormente recollidas segue a provocar enfermos sen tratamento e a morte de moitos deles. Para falar e denunciar a grave situación que están a vivir todas estas persoas participarán na mesa redonda Elena Rivas e Nieves Cabalo, da Plataforma de Afectados pola Hepatite C, e Moncho Veras, da Plataforma SOS Sanidade Pública.