A Consellería do Medio Rural destina 64 millóns de euros á posta en valor dos produtos do mar e da terra

Rosa Quintana en Xantar

A Consellería do Medio Rural e do Mar destina para o presente exercicio un total de 64 millóns de euros para a posta en valor dos produtos do mar e do agro, a través de diversas liñas de axudas. Entre elas, cabe destacar a ampliación da capacidade produtiva e transformadora, a valorización comercial e a promoción dos produtos galegos. Así o destacou esta mañá a titular deste departamento autonómico, Rosa Quintana, durante a inauguración do “Día do Mar e do Medio Rural”, no marco da 16ª edición do Salón Internacional de Turismo Gastronómico – Xantar.

Rosa Quintana destacou a importancia deste tipo de eventos, que se consolidan ano tras ano como escaparates do panorama nacional e internacional para a promoción dos produtos galegos. Uns produtos, engadiu, que veñen acreditados a través das 32 marcas de calidade diferenciada e que evidencian o merecido recoñecemento e prestixio dentro e fóra de España. A conselleira puntualizou que, proximamente, sumarase a esta listaxe o “Capón de Vilalba”, convertendo a Galicia na comunidade con máis selos de calidade.

A titular de Medio Rural e Mar sinalou que a promoción dos produtos galegos é tarefa de todos, comezando pola Administración, polo que é preciso traballar para que a calidade conseguida non decaia e traspase fronteiras. Neste senso, Rosa Quintana gabouse da celebración desta feira, que conta por segundo ano consecutivo co selo “Feira Comercial Internacional”, que outorga o Ministerio de Economía y Competitividad, e que serve como claro exemplo de promoción dos produtos galegos.

No marco desta feira, a conselleira participou no programa “O Sabor da aventura está no mar”, unha actividade levada a cabo polo seu departamento coa que se busca facilitar o coñecemento e consumo de produtos do mar aos máis pequenos dun xeito lúdico.

Xantar 2015

O Salón Internacional de Turismo Gastronómico convoca en Expourense a 140 expositores que ocupan 12.000 metros cadrados de superficie. O programa presenta máis de 100 actividades que apostan pola profesionalización do sector hostaleiro, coa participación de 17 restaurantes que ofrecen menús con prezos accesibles, baseados nos produtos autóctonos e de calidade de cada rexión. Ademais, por primeira vez hai dúas aulas gastronómicas nas que prestixiosos chefs de Galicia, Portugal e Costa Rica farán exhibicións de cociña en directo.

Nesta edición, o país convidado é Costa Rica, ademais de estar presentes outros países tales como España, Portugal, México, A Arxentina, Francia, Perú, Cuba, Ecuador e Paraguai.