Vilagarcía solicita 16 socorristas para a temporada de verán a través do plan de cooperación

O Concello de Vilagarcía remitiu á Consellería de Traballo e Benestar a súa solicitude se subvención para a contratación temporal de 18 traballadores desempregados. 16 socorristas, un técnico Informático e un traballador social son os postos que o Concello demanda na súa proposta da axuda por importe de 66.573 euros, aos que a administración local engadiría 1.400.

A proposta da Concellería de Traballo e Benestar do Concello foi aprobado en xaneiro pola Xunta de Goberno Local e xa se remitiu á Xunta de Galicia co obxecto de adiantar no posible a tramitación das axudas que nos últimos anos resolvíanse co tempo moi xusto para que os socorristas contratados puideran comezar a traballar co inicio da temporada de praias.

A intención do Concello é que o Técnico Informático e o Traballador Social traballen no Concello a media xornada durante un prazo de seis meses a contar a partir do 1 de abril. No caso do persoal para a atención das praias, tanto os 13 socorristas como os 3 técnicos axudantes de Protección Civil contrataranse coa categoría de peón, a xornada completa durante un período de 3 meses a contar a partir do 1 de xullo.

Agora a administración local deberá esperar a que a Consellería de Traballo resolva a concesión das axudas para poder mandar a oferta de emprego ao Servizo Público de Emprego.