Un numeroso grupo do IES As Bizocas do Grove realizará o roteiro Castelao

Un grupo de 65 alumnos/as de 3º e 4º de ESO do IES As Bizocas (O Grove) farán mañá martes, día 24 de febreiro, o roteiro Castelao polas rúas da zona histórica de Pontevedra. A visita desenvolverase en dúas quendas: ás 10 e ás 12 horas horas, con saída desde a praza da Ferraría.

O percorrido inclúe unha visita á Sala Castelao do Museo de Pontevedra e ao edificio modernista da Fundación Caixa Galicia, onde se situaba o Café Moderno.

O Concello de Pontevedra segue a ofrecer estas visitas guiadas pola Pontevedra máis vencellada a Castelao, co obxecto de ligar o uso da lingua galega aos espazos urbanos da cidade, recuperar e difundir a memoria histórica inserida no contorno xeral da historia de Galicia e dinamizar os usos orais da lingua galega no ámbito urbano.

Por mor da climatoloxía adversa, ou por outras circunstancias, esta visita podería sufrir modificacións. De ser así, procuraremos mantelos informados.