Santiago Futsal enfróntase á súa segunda proba consecutiva na loita pola permanencia

Os xogadores de Santiago Futsal mídense mañá á segunda proba consecutiva na loita pola permanencia. Tras o partido da xornada pasada ante Prone Lugo AD, no que o conxunto branco conseguiu só un punto (4-4), agora enfróntanse a Uruguai Tenerife, penúltimo clasificado e rival directo na loita por conseguir a permanencia de forma matemática.

Mentres os de Santiago se sitúan na duodécima posición da táboa con vinte puntos, empatados co décimo terceiro e a só un punto da undécima posición; o seu rival de mañá é penúltimo con nove puntos, a seis da salvación e a once puntos do Santiago Futsal.

Os xogadores de Santi Valladares visitan unha cancha na que o conxunto local unicamente asinou unha vitoria, o 3 de Outubro do pasado ano ante Levante (5-1). Así mesmo, o equipo tinerfeño é o conxunto máis goleado da Liga, ao ter encaixado 131 goles, 60 deles como equipo local. Ademais, o conxunto celeste suma un total de doce derrotas consecutivas.

Pola súa banda, Santiago Futsal chega a este encontro como o segundo equipo menos goleador a domicilio, con 18 tantos; pero tamén sendo un dos que menos goles recibe fóra de casa, só superado polos catro primeiros clasificados.

En canto ao partido de ida, no que o conxunto compostelán se impuxo no Fontes do Sar por 5-2, os de Santi Valladares asinaron un partido moi completo, logrando pechar o partido con tres goles na segunda parte e deixando sen posibilidades de remontada ao equipo insular.

A vitoria de mañá no Pavillón dos Deportes de Santa Cruz de Tenerife deixaría os de Santiago 14 puntos por enriba do descenso e da penúltima posición, o que supoñería un gran paso na consecución da permanencia e permitiría ao conxunto galego mirar máis para arriba na clasificación.

A expedición branca viaxará mañá pola mañá a Tenerife con todos os seus efectivos, a excepción de Diego Quintela, que arrastra molestias no cuádriceps e é baixa para o partido de mañá.