San Sadurniño e Biela e Chaveta asinan un convenio para continuar fomentando o ciclismo no municipio
O presidente do club MTB Biela e Chaveta, Sergio Collado, e o alcalde rubricaron este luns o convenio mediante o que esta entidade e o Concello se compromenten a colaborar durante 2015 na organización de distintas actividades encamiñadas a promocionar o ciclismo local. O importe do acordo ascende a 1.000 euros, destinados a programar -como mínimo- a marcha cicloturista que se celebra en xullo e unha ruta BTT no mes de agosto, cadrando coa Feira Rural.
Porén, o convenio tamén establece “un marco permanente de colaboración” entre o Concello e o clube no que dunha banda o ente municipal contribúe “a afianzar o desenvolvemento dunha actividade con proxección de futuro” e da outra Biela e Chaveta “ofrece a súa experiencia e capacidade organizativa en toda actividade relativa á práctica desta actividade”.
Unha experiencia e capacidade que quedaron demostradas no último grande evento organizado polo clube, a I Ruta BTT Concello de San Sadurniño, na que participaron 116 ciclistas percorrendo 45 quilómetros do noso territorio e ao que Biela e Chaveta destinou un dispositivo humano de máis de medio cento de persoas.
O acordo suscrito co Concello -que durará ata decembro- leva aparellado o compromiso do clube de colaborar co departamento de Deportes prestándolle apoio técnico en calquera outro evento que se decida levar adiante en relación co mundo da bicicleta.