Puertas de Galicia promocionará os seus atractivos turísticos no Centro Comercial Gran Vía de Vigo

Este sábado 21 de febreiro o Road Show de Puertas de Galicia visitará o Centro Comercial Gran Vía de Vigo, co fin de amosar todos os recursos turísticos das comarcas de Monterrei e Conso-Frieiras a través da súa oferta gastronómica e vitivinícola, patrimonio natural e cultural.

Ao longo de toda a xornada, en diferentes horarios, os/as visitantes poderán participar nas diversas actividades programadas. O cociñeiro Luis Vidal elaborará, en show cooking, pratos como “Caramelos crocantes de mazá e viño da Denominación de Orixe Monterrei” ou “Roxón e chocolate picante”. Tamén se poderá formar parte de breves sesións de cata guiada dos viños da Denominación de Orixe Monterrei, pedalear coñecendo as rutas cicloturistas do territorio ou fotografarse no posto e gañar unha Escapada de fin de semana a Puertas de Galicia para dúas persoas. Mentres que os/as nenos/as poderán gozar nos seus obradoiros de manualidades, aprendendo a elaborar as súas máscaras de Entroido ou as “chocas”.

O Road Show de Puertas de Galicia xa visitou Ourense e Pontevedra, e continuará a súa andaina ao longo dos meses de febreiro e marzo as cidades de Lugo, A Coruña e Santiago de Compostela. Esta promoción, que se inclúe dentro das actividades propias do Plan de Competitividade Turística Puertas de Galicia, ten dous obxectivos concretos: amosar o territorio das comarcas de Monterrei e Conso-Frieiras (Xeodestino Verín-Viana), aos mercados emisores de proximidade, e promover o noso territorio directamente a público final. A través da mesma darase a coñecer estas dúas bisbarras bisbarras a bo número de potenciais visitantes nun ámbito próximo non maior a dúas horas, o que axudará a desestacionalizar o turismo e que nos poidan visitar ao longo de todo o ano.

O Plan de Competitividade Puertas de Galicia está promovido por Turespaña, Secretaría Xeral para o Turismo da Xunta de Galicia e once municipios (Cualedro, Laza, Monterrei, Oímbra, Riós, Verín, Vilardevós, A Gudiña, A Mezquita, Viana do Bolo e Vilariño de Conso), integrados na Asociación de Municipios para o Plan de Competitividade Turística das comarcas de Monterrei e Conso-Frieiras, e a Asociación de Empresarios de Turismo e Hostalería Puertas de Galicia. Entre os obxectivos deste plan están a busca de especialización tanto no destino como no produto, deseñar unha oferta capaz de introducir a experiencia turística como elemento motivador da viaxe, así como a busca da mellora da competitividade das PEMES e MPEMES turísticas para lograr a sostenibilidade do territorio.