Preséntase o CC Rías Baixas-Supermercados Froiz

Presentación do club

O presidente da Deputación de Pontevedra, Rafael Louzán, manifestou hoxe na presentación do CC Rías Baixas-Supermercados Froiz que o club ciclista pontevedrés “é un orgullo para Galicia polos grandes éxitos que está a conseguir con humildade, con dedicación e con profesionalidade exquisita”.

Na presentación e fotografía oficial do club, que tivo lugar no Museo de Pontevedra, Louzán resaltou os éxitos do equipo, que o levaron a ser, durante sete anos consecutivos, o mellor equipo da clasificación nacional elite e sub-23.

O estradense Óscar González pasa á elite

A Deputación é patrocinadora oficial do equipo, cunha axuda de 25.000 euros, motivo polo cal os corredores levan no maillot as lendas “Rías Baixas” e, nun tamaño máis pequeno, “Deputación de Pontevedra”.

Louzán destacou o labor de Magín Froiz e do director do equipo, Evaristo Portela, na consecución dos logros dun equipo que afronta a nova temporada só con ciclistas galegos.

O novo proxecto conta con dezaseis corredores, dos cales sete son de nova incorporación. Entre os nove que continúan figuran Pedro Merino, o estradense Óscar González (que pasa á elite), Sergio Míguez, José Luis Mariño, Miguel Gómez, Roberto Mediero, Antonio Portela, Samuel Blanco e Javier Pérez.