Povisa conclúe en Panxón a extensión do servizo de hospitalización a domicilio ao Val Miñor

O Hospital Povisa finaliza a extensión do seu servizo de hospitalización a domicilio -HADO- no Val Miñor coa súa implantación, a partir do próximo luns, no centro de saúde de Panxón. Este servizo comezou a ofrecerse en Nigrán o pasado mes de decembro, ampliándose progresivamente aos centros de saúde de Baiona e Gondomar.

Os profesionais de Povisa colaborarán estreitamente cos de atención primaria, avaliando de forma conxunta o estado dos pacientes susceptibles de recibir atención hospitalaria a domicilio, que equipos deberán atendelos en función da súa complexidade e o programa de atención que deberá aplicárselles.

A atención hospitalaria a domicilio supón nun avance importante na calidade asistencial dos pacientes de Povisa, sobre todo no caso daqueles que necesitan coidados exclusivamente paliativos ou nos que teñen grandes dificultades, por razón da súa idade, a súa situación familiar ou a súa enfermidade, para desprazarse ao hospital ou ao seu centro de saúde.