Os Reis inauguran na Coruña a mostra sobre a etapa de Picasso na cidade

Os Reis de España inauguraron este xoves, no Museo de Belas Artes da Coruña, a mostra ‘El primer Picasso. A Coruña 2015’, promovida polo Concello herculino, en colaboración con institucións públicas e privadas, para dar a coñecer a etapa do artista na cidade herculina. Ao acto de inauguración, asistiron numerosas autoridades que, previamente, acudiron, xunto ás súas Maxestades, ao acto de entrega das Medallas de Ouro do Eixo Atlántico e a clausura da súa XXIII Asemblea Xeral, no Teatro Rosalía de Castro.

Á súa chegada, os Reis sacáronse unha foto xunto a unha placa conmemorativa, acompañados do presidente da Xunta, Alberto Núñez Feijóo, e do alcalde da Coruña, Carlos Negreira. Posteriormente, realizaron un percorrido polas salas que acollen esta mostra.

Entre outras autoridades, tamén estiveron presentes a ministra de Fomento, Ana Pastor; o titular de Cultura, Educación e Ordenación Universitaria, Román Rodríguez; as conselleiras de Medio, Territorio e Infraestruturas e de Traballo e Benestar, Ethel Vázquez e Beatriz Mato, respectivamente; así como a presidenta do Parlamento galego, Pilar Rojo.

Representantes do mundo da cultura, da arte, da política e dos medios de comunicación asistiron tamén á inauguración desta mostra coa que se pretende reivindicar a primeira etapa do artista malagueño.

MÁIS DE 200 OBRAS

Para iso, a mostra reúne, xunto ás obras do artista creadas na localidade galega, pezas súas posteriores, pero que gardan relación con ese período; así como obras de pintores contemporáneos de Picasso e que exerceron influencia sobre el.

En total, exhíbense 207 obras, das cales 81 son de Picasso, entre elas os 33 óleos e 42 debuxos. Un total de 59 correspóndense á súa etapa coruñesa e, entre as obras, haberá pezas que nunca foron expostas.

Tamén se poderán ver algunhas das pezas máis coñecidas do autor malagueño, como ‘A rapaza dos pés descalzos’, a obra máis importante que o artista pintou na Coruña e que cedeu o Museo Picasso de París.

Comisariada por Malén Gual, conmemorará, ademais, o 20 de febreiro os 120 anos da primeira exposición de Picasso, que se celebrou na Coruña. A mostra poderá visitarse ata o próximo 24 de maio no Museo de Belas Artes.

Na súa presentación, o alcalde remarcou que lles tivese gustado poder ampliar o período expositivo, pero que non foi posible “polas esixencias” de boa parte dos prestamistas. Na iniciativa, colaboran entidades privadas como Repsol e institucións públicas como a propia Xunta de Galicia.