Os Fexteiros teñen unha cita con Carmiña Brañolas e as Tarañolas

A programación dos Fexteiros regresa este domingo ao recinto da Maroma para divertir aos máis pequenos da casa. Nesta ocasión, o espectáculo correrá da man da compañía Titirimañas que servirase dos seus monicreques para representar a historia de Carmiña Brañolas e as Tarañolas. Será ás seis da tarde no recibidor de Fexdega e a entrada é libre e de balde.

Xoaniña e unha meiga mala, malisima e peideira, que ven buscar aos rapaces que sen facerlle caso ós seus pais, non se queren lavar os dentes. A pequena Sabeliña é a protagonista desta historia na que tamén interveñen Xoanilla Dentes Verdes, Charrasquiño, Duende do Bosque, Mosca e o Ogro. Será capaz Sabeliña de derrotar á meiga?

Os nenos e nenas que desexen desvelar esta pregunta terán que acudir o domingo pola tarde a Fexdega a ver a representación recomendada para cativos de 4 a 9 anos de idade. Ademais de pasalo ben coa historia, poderán interactuar coas personaxes que aproveitarán o argumento para incidir na importancia da hixiene bucal e fomentar valores como a amizade e a solidariedade, o respecto ou o coidado do medio ambiente.