O total de infraccións penais de xaneiro en Verín diminuíu un 12,5 % respecto ao mesmo período do ano pasado

O Concello de Verín acolleu unha reunión da Xunta Local de Seguridade, co-presidida polo subdelegado do Goberno en Ourense, Roberto Castro García, e o alcalde de Verín, Juan Manuel Jiménez Morán e na que participaron membros dos Corpos e Forzas de Seguridade do Estado e da Policía Local.

Previa aprobación da acta da Xunta de Seguridade do 24 de febreiro de 2014, os representantes das diferentes Forzas e Corpos de Seguridade e Policía Local foron dando conta dos informes en materia de seguridade cidadá. O total de infraccións penais do mes de xaneiro diminuíu un 12,5 % respecto ao mesmo período do ano pasado, e as estatísticas amosan un lixeiro incremento na porcentaxe de esclarecidos, tanto en faltas como en delitos.

Outro dos puntos destacados na orde do día foi o deseño do dispositivo de seguridade cidadá que se establecerá nas Festas do Entroido, priorizando o importante eido de colaboración entre a Policía Local do Concello de Verín e as Forzas e Corpos de Seguridade do Estado.

O subdelegado do Goberno insistiu no bo facer das Forzas e Corpos de Seguridade e a Policía Local e precisou que “o traballo eficiente e minucioso desenvolvido ata o de agora estase a reflexar na baixada dos índices delictivos da comarca”.

Castro tamén se interesou pola organización dos eventos festivos, relacionados coa celebración do Entroido e animou aos veciños a participar destas festas tan importantes para Verín, e para Galicia.