O Teatro Principal de Santiago acollerá a representación de “Bobas&Galegas. Mofa e Befa no Século de Ouro”

O dúo cómico Mofa e Befa, composto por Evaristo Calvo e Víctor Mosqueira, representará, dende o próximo mércores 4 ata o sábado 7, no Teatro Principal de Santiago un total de catro funcións do seu novo espectáculo teatral, ‘Bobas&Galegas. Mofa e Befa no Século de Ouro’. Serán ás 20,30 horas.

Durante a rolda de prensa da presentación do espectáculo, a concelleira de Cultura de Santiago, María Antón, recordou que as entradas se puxeron á venda dende principios do pasado mes, cando saíu á luz o bono de Teatro Galego (e portugués). O seu prezo é de dez euros (oito no anfiteatro) e pódense comprar no despacho de billetes do Teatro Principal, de 18,00 a 21,00 horas.

Ademais, María Antón explicou que ‘Bobas&Galegas’ presentouse o ano pasado na última edición do festival de Teatro Clásico de Almagro (Cidade Real), polo que o éxito “está asegurado”.

Unha obra que mestura teatro clásico e contemporáneo, segundo sinalou o seu director, Quico Cadaval, e destinada a aquel público que posúe “ansiedade por escoitar cousas que non hai noutros sitios”.

Só aparecen dúas persoas en escena, o que converte a esta produción nunha “das máis complexas”, segundo o actor Evaristo Calvo. Para el, este feito “leva aos límites” o seu capacidades como actor, xa que “a obra é esixente”.

ESPAZO ONÍRICO

Evaristo Calvo centrouse nas “figuras ausentes” que fixeron posible que o proxecto teatral se levase a cabo, tales como o encargado de escenografía e iluminación, Baltasar Patiño, grazas ao cal o espazo escénico se converteu en “onírico”.

Un escenario enchido de “case” duascentas almofadas, segundo este actor, polo que fomenta a imaxe de “irreal” e “fantástico”, ao tempo que recorda os campos de Castilla. “Recorda á monotonía, ás chairas onde Quico Cadaval situou a obra”, apuntou.

En ‘Bobas&Galegas’ están presentes os autores do Século de Ouro español, como Calderón ou Lope de Vega, pero dunha forma “case canónica”, segundo puntualizou Calvo. E é que o obxectivo é levar estes autores clásicos “ao seu terreo”.

O VERSO

Nesta ocasión, o dúo Mofa e Befa tratará co teatro en verso, ao que Cadaval “sempre” lle tivo admiración. “O verso é difícil, posto que xa o é traballar en prosa”, apuntou Calvo.

Un argumento no que coincide o seu compañeiro de escenario, Víctor Mosqueira, quen dixo que o “máis difícil” da obra foi aprender o texto en verso.

Por iso, para a elaboración do texto en verso contaron coa colaboración de Jesús Aladrén, cualificada por Calvo como unha “personalidade” no adestramento de actores e cantantes na dicción do verso.

A MÚSICA

O director musical, Fernando Reyes, sinalou que a música presente en toda a obra é a música da época de Calderón –ao igual que os textos– porque “é o recurso máis sinxelo” para contar esta historia”.

Así, dixo que foi unha parte “esencial” da dramaturxia durante todo o teatro clásico, e o texto de ‘Bobas&Galegas’ “non tería sentido” sen ela. “A música é parte do texto e non tería sentido sen ela”, indicou.

Ademais, explicou que na obra non se conservan as músicas de forma exacta, senón que o seu papel era ofrecer unha proposta próxima ao texto da época. Ao respecto, Reyes cualificou como “moi agradable” o seu traballo nesta iniciativa, “a pesar do pouco tempo para preparala”.

Cadaval, pola súa banda, engadiu que a música da obra é unha homenaxe á música galega que chegaba a Castilla nesa época.