O PSOE de Fene considera que as medidas adoptadas polo PP nas curvas de Santa Ana foron un simple parcheo

Un novo accidente con feridos nas curvas de Santa Ana pon de manifesto que as medidas adoptadas polo PP nese tramo son claramente insuficientes, como volveu a advertir o portavoz do grupo municipal socialista, Antón Noceda, no último pleno. O responsable local do PSdeG-PSOE lamenta que o alcalde siga sen tomar en serio a seguridade dos nosos veciños e veciñas malia as reiteradas peticións que o noso grupo vén facendo dende setembro.

A raíz da última iniciativa presentada polos socialistas, o alcalde anunciou a través da prensa que se reforzaría a sinalización horizontal e vertical e que se melloraría a capa de rodadura, pero no ultimo pleno escusouse dicindo que como non é especialista na materia non sabe que tipo de medidas se deben adoptar. Unha vez máis, Gumersindo Galego demostra que solo actúa de cara á galería, e que as medidas adoptadas nas curvas de Santa Ana foron un simple parcheo para intentar acalar as críticas.

Dende o PSOE insistimos, e seguiremos facéndoo, en que non basta con colocar dous sinais luminosos _un dos cales, por certo, non funciona correctamente_ para advertir aos condutores da perigosidade das curvas. Fai falla tamén sinalización horizontal e, sobre todo, que se leven a cabo as obras necesarias para mellorar a capa de rodadura, que parece evidente que non reúne as condicións de adherencia esixibles nese tramo e nunha vía desas características.

“¿Cantos accidentes ten que haber para que o alcalde tome en serio a seguridade dos nosos veciños e veciñas?”, pregunta Antón Noceda. O portavoz socialista lamenta que Gumersindo Galego siga dando mostras da súa incapacidade para gobernar o Concello de Fene e para dar resposta aos problemas da cidadanía.