O mércores remata o prazo para inscribirse no concurso do Xoves de Compadres en Monforte
Ás 14:00 h do mércores día 4 de febreiro remata o prazo para inscribirse no concurso do Xoves de Compadres, organizado pola delegación de Cultura dentro dos actos do Entroido 2015 en Monforte.
As solicitudes de inscrición para a participación no concurso presentaranse no Rexistro Xeral do Concello de Monforte, podendo anotarse, segundo o caso, nas convocatorias para centros de ensino; parroquias, barrios e rúas do Concello; e individuais. En cada un destes tres apartados establécense dúas modalidades: colectivo e individual.
Nas convocatorias de centros de ensino e individuais, tódolos compadres inscritos concentraranse na Praza de España ás 17:30 h do xoves día 5, onde se darán a coñecer os premios e se procederá á queima dos monecos.
Na convocatoria de parroquias, barrios e rúas do Concello, os compadres inscritos colocaranse nos lugares elixidos polos participantes dende a primeira hora da mañá. O xurado visitaraos ata as cinco da tarde e dará a coñecer o resultado ó mesmo tempo que o da convocatoria de centros de ensino e individuais.
PREMIOS (por convocatoria):
Individuais Colectivos
1º premio 65 € 1º premio 95 €
2º premio 35 € 2º premio 65 €
Accésit 18 € Accésit 30 €
Premio á etnografía 100 € Premio á crítica social 100 €
Dende a concellería de Cultura anímase á veciñanza a continuar coa tradición dos compadres, ben sexa participando no concurso organizado polo Concello ou á marxe do mesmo.