O Concello de Lugo abordará no pleno unha moción para reprobar a Rocío Mosquera

O alcalde de Lugo, o socialista José López Orozco, anunciou este venres que será no próximo pleno, o 2 de marzo, cando se abordará unha moción para reprobar a conselleira de Sanidade, Rocío Mosquera. Orozco avanzou que previamente se reunirá a xunta de voceiros, formada por PSOE; PP e BNG, o próximo xoves 26 de febreiro. Ao respecto, o rexedor mostrou a predisposición do grupo de goberno a “cambiar” a súa “proposición” e chegar a un acordo no que se quere incluír os populares.

Ademais da moción, o alcalde de Lugo desvelou que a Federación de Asociacións de Veciños pediu intervir no pleno, solicitude “que está a estudar o secretario”, apostilou.

O rexedor lucense sinalou que a motivación da devandita iniciativa se centra en querer “os mellores servizos para todos os lucenses”. “O servizo de hemodinámica non pode ser de oito horas, senón de 24 horas tal e como se nos prometeu e tal como teñen as outras cidades de Galicia”, subliñou.

“Os lucenses non podemos ser menos. Parécenos unha desfachatez que a conselleira veña a Lugo a anunciarnos o contrario, pero moito peor parécenos que Castiñeira, home de xenio curto, aplauda esta decisión de Mosquera. Isto parécenos que é estar en contra dos veciños de Lugo”, lamentou sobre as palabras de Mosquera hai un par de semanas no Hospital Universitario Lucus Augusti de Lugo.

Sobre unha proposta rexistrada polo grupo Foro Lugo Independente para que sexa designada tamén persoa non grata” a voceira dos populares no Concello e parlamentario autonómico, Jaime Castiñeira, por “non saber defender os dereitos dos lucenses”, Orozco manifestou que “se estudará cando a presenten”.