O Concello da Laracha completará a expropiación dos terreos afectados pola ampliación da Edar do Formigueiro

O proceso de expropiación dos terreos afectados polo proxecto de ampliación da estación depuradora de augas residuais (EDAR) de O Formigueiro completarase este xoves. Os actuais propietarios están citados no Concello para proceder ao levantamento das actas de pagamento e ocupación.

O Concello da Laracha investirá máis de 34.000 euros na adquisición de dúas parcelas que suman en total 8.709 metros cadrados de superficie. Os terreos pasarán a ser de titularidade municipal e quedarán en disposición de albergar a citada ampliación da EDAR.

Deste xeito o Concello da Laracha continúa dando os pasos necesarios e cumprindo os trámites urbanísticos municipais preceptivos para que, posteriormente, poida levarse a cabo a actuación contemplada no Plan especial do sistema xeral de infraestruturas de servizos (SXIS) de saneamento e abastecemento de auga.

A EDAR do Formigueiro é a principal depuradora do municipio e recibe a carga tanto dos cascos urbanos da Laracha e de Paiosaco como de numerosos núcleos rurais aos que se dotou co servizo de sumidoiros durante os últimos anos.