O Celta mostra a súa gratitude ao celtismo polo recibimento ao equipo e o seu alento durante o encontro

Orgullosos do noso: orgullosos dos nosos. O lema da campaña de subscritores cobrou pleno sentido na xornada de onte. Máis alá de manifestar o seu sincero agradecemento, o Real Club Celta quere expresar o inmenso orgullo que lle produciu o recibimento ao equipo e o apoio da afección. Orgullo dun celtismo que respondeu coa alma nun momento especialmente complicado e difícil, que supliu cos seus propios latexos o cansazo e coa súa fe calquera indicio de dúbida na vitoria.

O desgaste que xera na confianza e a autoestima un longo refacho de partidos sen vitorias foi devorado pola afección celeste cun recibimento ao equipo espectacular, un xeneroso apoio, plausible en calquera momento, admirable cando os resultados tenden a transmitir desencanto ou decepción. Lonxe de caer neses sentimentos, o celtismo encheu a rúa Manuel de Castro de ilusión e enerxía.

O apoio ao equipo foi constante durante o partido, gratificante e xeneroso co bo xogo, pero o que define á afección celeste non son os aplausos tras as boas xogadas, senón como animou sen desmaio nos momentos nos que o equipo acusaba o cansazo e a tensión.

O triunfo ante o Córdoba foi moi importante a nivel anímico e mesmo clasificatorio, pero sobre todo foino porque deixou constancia de que este equipo xamais camiñará só e reafirma unha máxima xa instalada na vida celeste: Xuntos conseguirémolo. Grazas afección. #Orgullososdosnosos