O autobús do Centro de Transfusións de Galicia estará en San Sadurniño esta tarde

Para atender as necesidades da sanidade galega fan falla unhas 500 doazóns de sangue diarias. O Centro de transfusións de Galicia ten varias unidades móbiles percorrendo o país para facilitar a doazón, un acto altruísta que axuda a salvar vidas. Este xoves 26 de febreiro unha destas unidades estará durante toda a tarde na praza do antigo Concello.

A doazón de sangue é un acto seguro, sinxelo, cómodo e necesario para que moitas persoas poidan solucionar o seu problema de saúde e mesmo salvar a vida. Os homes poden doar un máximo de 4 veces ao ano e as mulleres 3, deixando pasar entre cada doazón un mínimo de 2 meses.

Poden doar sangue as persoas que teñan unha saúde normal, con máis de 50 quilos de peso e cunha idade entre 18 e 65 anos. É vital que a persoa doadora achegue toda a información posible sobre o seu estado de saúde, xa que o sangue doado vai destinado a axudar a recuperación dos doentes.

Doar sangue é un acto solidario e tamén responsable. En caso de que calquera persoa teña algunha dúbida sobre se pode ser doante ou non, pode consultar cos médicos do CTG nas unidades móbiles ou nos locais de doazón. Tamén pode chamar ao teléfono gratuíto 900 100 828, das 8.00 ás 22.00 h. A chamada é de balde tanto para fixos como para móbiles. Outro medio de consulta é a web do CTG, onde se recolle grande cantidade de información sobre a doazón.

A unidade móbil do CTG fará as extraccións en San Sadurniño este xoves pola tarde entre as 16.00 e as 21.00 h. Estímase que fan falla 500 doazóns de sangue ao día para atender as necesidades do sistema sanitario galego, unha cifra que se incrementa nos meses de verán. Con todo, os compoñentes do sangue poden conservarse e, desta maneira, ir facendo acopio para cubrir as necesidades diarias e as dos momentos de maior demanda. O sangue é vida e podemos compartila cun simple xesto.