O alcalde de Ferrol insta a Navantia a mostrar a súa capacidade de diálogo cos sindicatos

O alcalde de Ferrol, José Manuel Rey Varela, mostrou este martes o seu “respecto” pola decisión da Sala do Social da Audiencia Nacional de invalidar o convenio colectivo da empresa pública Navantia, e instou a empresa a “mostrar a súa capacidade de diálogo cos representantes sociais”.

Así manifestouno tras sinalar que, “con independencia do que decida a empresa”, en referencia á posibilidade de recorrer esta sentenza, “tal e como lle aconsellen os asesores xurídicos”, “obviamente os convenios colectivos hai que negocialos”.

Con estas manifestacións o rexedor popular volveu mostrar certo “desencontro” coa dirección do grupo naval público que preside José Manuel revuelta, xa que, ao longo dos últimos meses, foron varias as ocasións nas que o alcalde de Ferrol mostrou o seu rexeitamento a determinadas decisións tomadas dende a sede central da compañía en Madrid.

FLOTEL PEMEX

Preguntado Rey Varela sobre se a situación económica da petroleira mexicana Pemex pode afectar á construción dos dous buques flotel que tanto Navantia está realiza na Ría de Ferrol como Barreras en Vigo, o rexedor ferrolano asegurou que “non” lle “consta ningún tipo de contratempo”.

Ademais, reiterou que, segundo a información da que dispón, “ambas as dúas construcións están a evolucionar segundo os prazos previstos”, e que “calquera incidencia interna nesta empresa non ten por que afectar ao acordo de Pemex con Galicia”, aseverou.

RESTITUÍR DEREITOS

Tamén nas últimas horas dende a federación de CC.OO. Industria realizaron unha valoración da sentenza da Audiencia Nacional que anula o cuarto convenio colectivo de Navantia, xa que esta foi unha das partes demandantes, conxuntamente co sindicato nacionalista CIG, e que baseou a súa denuncia en que varios dos integrantes do comité intercentros non “estaba lexitimados para negociar o convenio e moito menos para asinalo”.

Por parte de CC.OO., felicitouse os traballadores de Navantia “porque este éxito é de todos” e “vén a restituír os dereitos dos sindicatos”.

Ademais, recordou que esta organización xa alertara de que “a configuración da comisión negociadora, pola parte social, non estaba lexitimada e que o comité intercentros”, que foi quen asinou o convenio, “non tiña competencias para negocialo nin para asinalo”, asegurando que malia as súas advertencias, dúas organizacións, “UGT e CSIF, e a representación da dirección da empresa, deron a calada por resposta”.

Tamén CC.OO. Industria insta a buscar “o diálogo, a negociación, baseadas no respecto mutuo, na confianza e na boa fe” para solucionar os problemas que afectan á empresa e para “resolver os conflitos socio laborables”, instando á dirección de Navantia “a que asuma esta sentenza como unha oportunidade para recompoñer o diálogo social” e que a súa decisión de “recorrer ante o Tribunal Supremo non será a solución, todo o contrario, alongará a situación de desestabilidade da empresa nun escenario crítico desta”.

CC.OO. aproveitou esta situación para reclamar un plan industrial que “garanta a sostenibilidade futura da empresa”, o mantemento do emprego, “unha compañía xeradora de riqueza económica, social e emprego” en todas as bisbarras e zonas onde están situados os seus centros, e que ofreza “estabilidade e condicións económicas e sociais dignas a todos os traballadores, incluídos os da industria auxiliar”.

CÁMARA DE COMERCIO DE FERROL

Por outra banda, o alcalde de Ferrol valorou este martes, a preguntas dos xornalistas, “como algo positivo”, a decisión da Xunta de abrir un período de tempo de alegacións para recibir as achegas dos empresarios de Ferrolterra, Eume e Ortegal no proceso que se está a seguir para liquidar a Cámara de Comercio de Ferrol.

A devandita decisión foi publicada este martes no Diario Oficial de Galicia (DOG). Ao respecto, Rey Varela “saudou este proceso participativo de dar audiencia a todo os interesados antes de concluír ningunha solución”.