Manuel Manquiña será o pregoeiro do Xoves de Comadres en Verín

O vindeiro día 12 de febreiro, o actor Manuel Manquiña será o encargado de realizar o pregón dunha das xornadas máis participativas, orixinais e emblemáticas do Entroido de Verín: o Xoves de Comadres. Con grandes doses de humor e ironía, o actor aportará unha visión particular aos asuntos de actualidade nunha noite na que se iniciará de modo oficial o ciclo do Entroido na localidade.

Manuel Manquiña é un dos actores galegos máis coñecidos de televisión, cine e teatro. Saltou á fama co filme Airbag, de Juanma Bajo Ulloa, e participou noutras comedias como Torrente, el brazo tonto de la ley. A súa carreira na TVG comezou con diversos programas humorísticos e no cine, baixo ordes de directores galegos como Antonio Blanco e Xavier Villaverde. Con máis de corenta de filmes ás costas como Porca Miseria, Pídele cuentas al rey, Capitanes de Abril, Lena, El caballero Don Quijote, Un rey en La Habana, Los Mánagers, O Apóstolo ou Lobos de Arga fixo ademais monólogos de humor e presentou e cantou en xiras musicais de Siniestro Total e do Xabarín Club.

Coa curtametraxe El figurante conseguiu tres premios á mellor interpretación masculina en distintos festivais: no IV certame de curtametraxes de Antequera, no XXIII festival de cine independente de Elxe, e na XII semana de cine de Aguilar de Campo. Tamén mereceu unha nominación ó premio Goya como actor revelación polo personaxe Pazos na longametraxe Airbag. No ano 2010, Manuel Manquiña exerceu como pregoeiro na inauguración da quinta edición da Feira do Viño da Denominación de Orixe Monterrei, e dous anos despois repetiu esta labor na xornada do Xoves de Comadres, congregando excelentes críticas entre veciños/as e visitantes.

O presidente dos empresarios e profesionais galegos de Estados Unidos exercerá como Don Carnal

Nesta edición, a figura de Don Carnal será exercida por Jose Manuel Brandariz, presidente dos empresarios e profesionais galegos de Estados Unidos. Este empresario galego é o presidente de CEO Beverly Hills Entertainment, unha empresa fundada no 1987, que produce e distribúe contidos de cine y televisión para toda Latinoamérica. Don Carnal, xunto coa Raíña do Entroido, é un dos persoeiros máis emblemáticos da noite do Xoves de Comadres en Verín. Con todo, Brandariz non acudirá só a esta celebración, xa que nesta ocasión o acompañarán dous coñecidos actores mexicanos, Salvador Zerboni e Leonardo García, e o director de cine Alan Coton.

Zerboni comezou a súa carreira de xeito profesional no ano 2000, aparecendo en varias telenovelas e series de televisión da televisión. Aínda que o seu debut no mundo das telenovelas o fixo a través da serie “RBD: A Familia”, no ano 2007, personaxe co cal se deu a coñecer en México. Desde ese momento participou en outras telenovelas e series como Machos, Cansada de Besar Sapos, Rudo y Cursi,Soy tu Fan, La Reina del Sur, La Mariposa, Abismo de Pasión ou Lynch; entre outras. No canto de Leonardo García, fillo do primeiro actor dominicano Andrés García. No ano de 1998 obtivo o seu primeiro papel protagonista na pantalla pequena: ‘Perla’ ao lado da actriz Silvia Navarro. Desde ese momento participou en serie de televisión e filmes como Belinda, Lo Que es El amor, Aguamarina, Con Toda El Alma, Horas violentas ou Perros de presa. O director cinematográfico mexicano Alan Coton, neto de galegos, estudou no Centro Universitario de Estudos Cinematográficos da Universidade Nacional Autónomo de México, onde realizou as súas primeiras curtametraxes (La Afectuosa Voz del Encargo N°54 del Banco Central, El Fin del Comienzo, El Viaje en Paracaídas); todos escritos, producidos e dirixidos por el, o mesmo que a longametraxe Pensamientos en película de 16 mm. É considerado un cineasta independente. En 2000 escribiu, produciu e dirixiu a película Sofía, a súa primeira longametraxe industrial coa que gañou en 2000 o premio á mellor película estranxeira no New York International Independent Film & Video Festival de Nova York. En 2004, Coton estreou a película Soba -estreada no Festival Internacional de Cine de Sofía-, tres anos despois filmou Nesio coa que gañou o premio da prensa no festival de Acapulco, o premio do público no Festival Mix da Cidade de México e recibiu unha “Deusa de Prata” como a mellor proposta cinematográfica do ano en 2009.