Lete Lasa destaca o auxe do Campo a Través entre os escolares

Lete Lasa na presentación do Campionato Galego de Campo a Través Escolar

O secretario xeral para o Deporte, José Ramón Lete Lasa, presentou esta mañá o Campionato Galego de Campo a Través Escolar, que terá lugar este sábado día 21 no complexo deportivo de Monterrei, instalacións dependentes da Xunta e situadas en Pereiro de Aguiar. Neste certame poden participar os clubs e centros educativos clasificados nas correspondentes fases provinciais e está previsto que compitan 381 atletas.

No transcurso de acto celebrado en compañía do delegado territorial da Xunta en Ourense, Rogelio Martínez, e do director técnico da delegación de Ourense da Federación Galega de Atletismo, Ángel Fidalgo, o responsable autonómico de Deportes subliñou o auxe desta modalidade deportiva en Galicia, “que nas últimas tempadas medrou máis dun 27 por cento en participación”, pasando de 15.737 escolares no período 2011-2012 aos 20.051 da tempada actual.

Lete Lasa indicou que o campo a través “é unha das modalidades deportivas estrela do programa Xogade”, que a Xunta desenvolve no eido escolar co fin de promover a actividade física e lúdica entre os máis novos, como parte do seu crecemento persoal e da súa calidade de vida. Salientou que, dentro do referido programa, o campo a través é a segunda actividade en deportistas practicantes -detrás do fútbol- e a primeira no que respecta ao número de centros educativos, con 364 adheridos na tempada actual, dos que 77 pertencen á provincia de Ourense.

Nesta liña, quixo agradecer ao profesorado de Educación Física o seu traballo na promoción desta disciplina deportiva, ao favorecer que “os rapaces e rapazas realicen exercicio físico saudable á vez que gozan da natureza e dos numerosos espazos de alto valor que temos en Galicia”.

Campionato Galego de Campo a Través

A final galega deste sábado no complexo deportivo de Monterrei inclúe probas para a alevíns, infantís e cadetes, nas categorías masculinas e femininas. Poden competir os clubs e colexios clasificados nas fases provinciais celebradas en Galicia, pasando á final deste sábado, por cada provincia e categoría, os dous primeiros equipos e os oito primeiros atletas -se non forman parte dos equipos clasificados-. En total, espérase a participación de 381 deportistas, que competirán a nivel individual e por equipos.

O Campionato Galego de Campo a Través Escolar será clasificatorio para o Campionato de España Cadete que terá lugar en Guadalajara os días 28 e 29 de marzo. Formarán parte da selección galega os cadetes que na final deste sábado acaden os catro primeiros postos.