Hernández cre que a imputación de Reyes Leis por suxerir a retirada dunha multa non é un tema de corrupción

O alcalde de Santiago, Agustín Hernández, opinou este xoves que a imputación que pesa sobre a concelleira Reyes Leis por un suposto delito de tráfico de influencias por suxerir, supostamente, a retirada dunha multa da ORA no seu vehículo, “non é un tema de corrupción”.

A orixe desta imputación áchase nas escoitas telefónicas decretadas no marco da Operación Pokémon ao exconcelleiro do PP en Santiago Albino Vázquez, encargado de Tráfico ata a súa detención e posterior dimisión, a quen a edila lle mandaría unha mensaxe tras ser multada por non poñer o tique.

Ao respecto, preguntado en rolda de prensa, o rexedor compostelano rexeitou “opinar” sobre “unha decisión do ámbito xudicial”, aínda que si puxo o acento en que a propia afectada “non ten información do xulgado” sobre o cambio na súa situación procesual e que se decatou a través do publicado no diario ‘La Voz de Galicia’.

Ademais, reiterou en distintas ocasións que “unha persoa imputada non é unha persoa condenada”, nin procesada, para intentar resolver o asunto. Así, cuestionado sobre a continuidade de Leis na Casa do concello de Santiago, unicamente indicou que ela “é concelleira” e que esa condición é “persoal”.

Con todo, engadiu que el non ten “ningunha dúbida” do seu labor municipal e de que “segue traballando para resolver os problemas dos seus ámbitos competenciales”, malia que está “desgustada” polo acontecido. E é que, como dixo, falou con ela da imputación, aínda que non -aseverou- do seu futuro.

“NIN AFECTA NIN DEIXA DE AFECTAR”

Acerca de se a súa imputación pesará para a súa eventual inclusión na lista do PP nas próximas eleccións municipais, Hernández recalcou que este asunto “nin afecta nin deixa de afectar”

Así mesmo, declinou pronunciarse sobre a imaxe que pode deixar a actuación de Leis nos veciños, sinalando que “o procedemento xudicial se resolve no ámbito xudicial”. E, sobre se el emularía esa actitude, sentenciou: “É que a min, que recorde, fai moito tempo que non me poñen unha multa”.

Por último, preguntado se non considera corrupción un delito de tráfico de influencias, negouse a “trasladar opinións ao respecto”. “Porque respecto absolutamente, en primeiro lugar, a presunción de inocencia e, en segundo lugar, os procedementos xudiciais,”, resolveu o primeiro edil da capital galega.