Figueroa ve ao Partido Popular de Vigo máis unido que nunca en torno a Muñoz

O presidente do PP de Vigo e voceiro do grupo municipal, José Manuel Figueroa, insistiu este luns en que o partido na cidade está “máis unido que nunca”, e garantiu que vai arroupar á candidata, Elena Muñoz, coa que haberá unha “coordinación perfecta”.

Nunha rolda de prensa na que estivo acompañado por case todos os seus compañeiros de partido na casa do concello, Figueroa sinalou que Muñoz “ten traballo por diante” no ámbito municipal, pero que “o fundamental é que terá o apoio sen fisuras do partido”.

O presidente do PP vigués, que chegou a recoñecer que se postulou como candidato, pero que deu un paso atrás porque coñece as súas “limitacións”, restou importancia ao feito de que a primeira comparecencia de Muñoz en Vigo como candidata fose nun acto no que non houbo ninguén do partido para acompañala.

“Foi unha cuestión de convocatoria, unha anécdota e unha cuestión puntual. Non lle damos importancia, non houbo mala intención, reafírmome no compromiso e apoio á candidata”, indicou Figueroa, quen proclamou o seu convencemento de que Elena Muñoz será “a próxima alcaldesa de Vigo”.

COORDINACIÓN

Por outra banda, o presidente do PP de Vigo indicou que haberá unha “coordinación perfecta” coa candidata, da que volveu resaltar a súa xuventude e experiencia como xestora, e coa que di ter “unha relación exquisita”.

A ese respecto, indicou que lle remitirá todos os proxectos presentados e o traballo realizado polas diferentes comisións do partido nos últimos meses. Segundo apuntou, Muñoz terá toda a información e decidirá “o que mantén e o que modifica”.

Así mesmo, sinalou que pediu ao grupo municipal que “redobre o seu esforzo” na recta final deste mandato, porque “xa hai candidata” e o partido estará “á súa disposición”.

FUTURO POLÍTICO

Finalmente, a preguntas dos medios, Figueroa a referido ao seu futuro político e reiterou que se manterá á fronte do partido e do grupo municipal ata que tome posesión a próxima corporación, a mediados de xuño que vén. “Despois desa data xa veremos o que pasa”, concluíu, sen desvelar se pretende seguir formando parte do grupo municipal.

O presidente do PP de Vigo advertiu de que vai continuar “dando a cara, mesmo máis” que se el mesmo fose o candidato, e defendeu a súa actuación á fronte do grupo municipal, en concreto, o acordo presupostario alcanzado con Cabaleiro, porque se fixo baseándose na “xenerosidade” do PP e “pensando en Vigo”.

OUTRAS VALORACIÓNS

Pola súa banda, a voceiro do BNG no Concello, Iolanda Veloso, tamén se referiu ao nomeamento de Elena Muñoz como candidata, e recordou que “como conselleira, non tivo en conta á cidade, máis ben todo o contrario”.

Veloso sinalou que Elena Muñoz “demostrou que non sabe ou non lle interesa mellorar a situación económica de Vigo”, e apuntou que, ademais de non ser coñecida na cidade, “nin sequera parece que teña grandes apoios” dentro do seu partido”.

Mentres, o alcalde olívico, Abel Caballero, respondeu aos xornalistas sobre a figura de Muñoz sinalando que el se limita a continuar co seu traballo de goberno e que, os que están “tan ocupados” coma el nese labor, falarán de candidatos e eleccións en “período electoral”.