Ferrol inviste 40.000 euros en varias actuacións de mellora e embellecemento de espazos públicos

A Concellería de Servizos e Medio Ambiente do Concello de Ferrol, que dirixe Borja Carro Muñóz, invistiu case 40.000 euros en diferentes actuacións de mellora e embellecemento de espazos públicos. Estas intervencións, que atenden a peticións veciñais, centráronse en catro puntos do municipio ferrolán: a estrada de Castela, Porta Nova e as parroquias de Serantes e Valón.

Así as cousas, na estrada de Castela -entre as rúas Pontevedra e Cataluña- acometeuse a reparación de alcorques de beirarrúas. Esta actuación de mellora completa os traballos realizados nas últimas semanas no contorno da estrada de Castela, que incluíron a colocación de xardineiras e a instalación dunha marquesiña.

Así mesmo, rrecuperouse, despois de anos, a iluminación no arco de Porta Nova, completando así as intervencións de mellora e mantemento das últimas semanas deste espazos coa poda de árbores, pintado de farolas, colocación de novos bancos con respaldo, a eliminación das pérgolas ou a reposición de lousas.

Outras das actuacións de mellora en espazos públicos se centraron na zona rural do municipio ferrolán. Unhas intervencións, demandadas polas asociacións veciñais de Serantes e Valón, que consistiron na instalación dunha acometida no local de Valón así como a eliminación de vertidos na estrada de Xoane, debido a un vertido no río da Sardiña. Estas son dúas peticións recollidas polo Goberno Municipal nas reunións semanais que mantén coas entidades veciñais ao abeiro do Plan de Barrios.