Corte de tráfico dun tramo da estrada Meira-A Fraga os días 20 e 23 de febreiro, e outro os días 24 e 25 deste mes

A Deputación de Pontevedra cortará ó tráfico a estrada Meira-A Fraga, no concello de Moaña, os vindeiros días 20 e 23 de febreiro, no seu primeiro tramo, desde o punto quilométrico 2 ata a glorieta do quilómetro 2,6; e os días 24 e 25 de febreiro, desde esta glorieta das proximidades do corredor do Morrazo ata o quilómetro 5,2, na Fraga.

Os cortes de tráfico veñen provocados polas obras de limpeza e roza das marxes da estrada e polos traballos de rehabilitación da capa de rodaxe e de sinalización vertical e horizontal desta.

Ademais destes traballos, as obras, que contan cun orzamento de 241.384 euros, implicarán o perfilado de noiros, a escavación de gabias, a colocación de tubaxes de formigón, o transporte de terras e outros necesarios para unha completa e integral rehabilitación e mellora da estrada Meira-A Fraga.