Catorce comparsas e máis de 1.000 persoas participarán no concurso de Nigrán

Nigrán celebrará mañá a partir das 19.00 horas na Avda. Praia América o concurso de comparsas, que contará con catorce comitivas integradas por máis de 1.000 persoas. Aínda que a día de hoxe o concurso mantense, a súa celebración está supeditada ás condicións meteorolóxicas, que a día de hoxe auguran fortes choivas.

Entre as comparsas inscritas atópanse “Piratadas por un tubo”, da escola de danza Marcando Pasos e a Asociación de Veciños A Unión de San Pedro; a comitiva “Ciklon”, de Tomiño; “Moulin Rouge”, de Mos; “Os terribles de Tebra”, de Tomiño; “Sete artes para un entroido”, de Mañufe; “Fantasía de primaveira”, da Asociación de Veciños Parada Miñor; e “O imperio do rei escorpión”, de Gondomar.