Buscan a dous sospeitosos por unha explosión para roubar nun caixeiro de Tui

A Garda Civil busca dous sospeitosos como presuntos autores da explosión rexistrada na madrugada deste mércores nun caixeiro automático da localidade pontevedresa de Tui, do que se levaron o diñeiro, segundo confirmaron fontes da investigación.

A explosión tivo lugar sobre as 4,15 horas deste mércores nun caixeiro dunha oficina de Abanca situada no baixo dunha vivenda unifamiliar do barrio da Estación, na parroquia de Guillarei. Malia os danos materiais, non se rexistraron feridos nin houbo que desaloxar ningunha vivenda.

A Benemérita traballa co roubo como principal hipótese da investigación, xa que o autor ou autores se levaron o diñeiro do caixeiro. Así, búscase dous sospeitosos que terían fuxido do lugar nun coche.

Fontes da investigación explicaron que, de momento, se descoñecen as características do artefacto que explotou. Ata o lugar desprazáronse efectivos do Tedax, un equipo de información da Garda Civil e axentes da Policía Local.