Barreiro móstrase satisfeito polo rexeitamento do fiscal a que o Supremo o investigue pola Pokémon

O presidente do PP de Lugo e voceiro dos populares no Senado, José Manuel Barreiro, mostrou a súa “satisfacción” ante as conclusións da Fiscalía do Tribunal Supremo, que non encontrou indicios abondo que xustifiquen a apertura dunha causa contra el polo momento e que remite a instrutora da Pokémon, Pilar de Lara, a que siga investigando.

A Sala do Penal do Supremo debe pronunciarse agora, a partir deste informe do Ministeiro Público, sobre se existen indicios de delito e as implicacións nas que podería ter incorrido Barreiro.

“Durante meses vin de forma regular noticias publicadas sobre min que era rotundamente falso e non podía defenderme, non tiña ningún mecanismo defensa”, lamentou o popular nunha rolda de prensa en Lugo na que presentou a reforma fiscal do Goberno central.

Por iso, explicou que se sente “satisfeito” con que a investigación chegase ao Supremo, “para que se tomase algunha decisión”.

Noutra orde de argumentos, Barreiro afirmou que o PP aspira a volver gañar na provincia de Lugo, pero a diferenza de 2011, coa maioría suficiente para poder gobernar.

DEPUTACIÓN DE LUGO

Así mesmo, acusou ao presidente do ente provincial, o socialista José Ramón Gómez Besteiro, de utilizar a Deputación “en beneficio persoal”, para “proxectar a súa imaxe”.

“Besteiro nunca gañou unhas eleccións e garanto aquí que nunca vai gañar unhas eleccións en Lugo, aspiramos a volver gañar e gobernar a Deputación”, proclamou.

Estas declaracións fíxoas tras informar de que a reforma fiscal impulsada polo Goberno, que afectará a uns 167.000 contribuíntes da provincia de Lugo, os cales terán á súa disposición un total de 25 millóns de euros máis en 2015 e 9, en 2016.