Ábrese o prazo de inscrición para o obradoiro “Motivación a emprender” en Ferrol

A Concellería de Emprego do Concello de Ferrol, que dirixe Martina Aneiros Barros, informou esta mañá da apertura do prazo para a inscrición no obradoiro “Motivación a empreder” que se desenvolverá o vindeiro día 23 de febreiro, ás 09:30 horas, no Centro Municipal de Emprego. Este taller está dirixido a todas aquelas persoas que teñan unha idea para empreder un negocio ou valoren a posibilidade de poñer en marcha a súa propia empresa no futuro.

“Motivación a emprender” tratará de ofrecer unha visión práctica do emprendemento e unha aproximación á posta en marcha dun negocio. O curso abordará os seguintes bloques: motivación para o emprendemento; a marca persoal; o plan de negocio; marketing e social media. As prazas son limitadas, polo que as persoas interesadas en participar neste obradoiro, poden apuntarse no propio Centro Municipal de Emprego, situado na rúa Sagrada Familia, ou chamando ao teléfono 981 94 41 95. As follas de inscrición poden descargarse a través da páxina web: www.ferrol.es/emprego.