A Autoridade Portuaria da Coruña aproba a licitación do proxecto ‘Smart Port’

O consello de administración da Autoridade Portuaria da Coruña aprobou a licitación do proxecto Smart Port, “un sistema tecnolóxico de xestión que se coordinará coa plataforma Smart City e que está orientado á automatización dos procesos e operacións que se desenvolven no porto”.

A licitación publicarase nos próximos días no Boletín Oficial do Estado e as empresas que concorran a esta terán un prazo dun mes para presentar as súas propostas.

O importe de licitación para o desenvolvemento e posta en marcha do proxecto ao longo do presente ano é de 5,1 millóns de euros, dos que 4,1 serán achegados pola Unión Europea.

Smart Port concíbese, segundo explica a Autoridade Portuaria, “como un sistema tecnolóxico integrado de axuda á xestión global e intelixente do porto e á toma de decisións”.

EN TEMPO REAL

“Todos os procesos relevantes que se desenvolven no recinto se integrarán en tempo real nunha mesma rede que conectará aos diferentes departamentos da Autoridade Portuaria, as empresas que prestan servizos no porto, os clientes e operadores, outras administracións e ao Concello da Coruña, mediante a plataforma Smart City”, engade.

O sistema aplicarase tanto no porto interior coma en Punta Langosteira. Entre os ámbitos de xestión que abranguerá figuran os dispositivos de seguridade e vixilancia, control de accesos, tráfico de vehículos, seguimento da chegada de buques e a súa estanza no porto, control ambiental, información meteorolóxica e xestión de mercadorías.