A asemblea de movementos sociais de Vigo pide o apoio da cidade para Imán
O xoves, 5 de febreiro ás 11:00 da mañá, colectivo Imán convoca unha concentración no antigo espazo de Sereos do Casco Lanuxe (Elduayen n.º 11), onde se desenvolvía o programa de atención a excluídos que suma actualmente dezaoito meses co seu local clausurado. A Asemblea pide que compareza todo o que poida, en mostra de apoio e respaldo ao profundo labor que este grupo leva anos realizando na loita contra a aporofobia e para contribuír á integración social.
Sobre a situación actual da polémica, lamentan que é un feito que o concello de Vigo mostre un total desinterese por dignificar a calidade dos servizos sociais na cidade, e que dende logo foi un enorme erro relegar os enfermos e pobres atendidos no local de Elduayen a unha furgoneta en zona industrial, onde non teñen ningún tipo de intimidade e se ven ademais prexudicados polas inclemencias do tempo, ademais de que este dispositivo non está dotado da cantidade de material e persoal abondo para levar a cabo a tarefa humanitaria e esencial de atender a estes cidadáns en risco de exclusión cunhas mínimas garantías de dignidade. Así, os usuarios descenderon notablemente, non porque a cota de pobreza decrecese un ápice en Vigo, senón polas condicións do servizo e o desmantelamento deste.
Recordan así mesmo a incoherencia da aceptación recente dun premio por parte do alcalde de Vigo polo seu labor na loita contra a drogodependencia, diploma que cren que debería ser entregado a este colectivo e os seus integrantes. Sereos foi un programa que rehabilitou e socializou a centos e centos de cidadáns afectados por pobreza severa, adiccións e VIH, durante un larguísimo período golpeado pola enfermidade e a droga que creou unha situación de emerxencia social sen precedente que houbo de ser emendada mediante o piar do voluntariado e a cooperación veciñal, baixo un paraugas institucional que un mal día decidiu retirarse, deixando en flagrante desamparo a un colectivo referente na loita pola vida.











