Uns 60 deportistas de diversas seleccións participarán no VI Trofeo Internacional de Karate Feminino Teresa Herrera

O Concello da Coruña, a través da Concellaría de Deportes, informa de que o polideportivo municipal do colexio San Francisco Javier acolle mañá, sábado 24 de xaneiro, a partir das 17.30 horas, o VI Trofeo Internacional de Karate Feminino Teresa Herrera.

O Concello colabora coa Federación Galega de Karate e Disciplinas Asociadas na organización deste evento deportivo no que participarán 60 deportistas pertencentes ás seleccións de Portugal, Castela e León, País Vasco, Cantabria e Galicia. En concreto, a selección galega estará composta por un total de 20 mozos das catro provincias.

A competición inclúe as categorías cadete, júnior e sénior das modalidades de kata e kumite feminino.