Unha vintena de veciños de Xustáns participa nun curso de primeiros auxilios

O alcalde de Ponte Caldelas na visita ao curso de primeiros auxilios

Unha vintena de veciños de Xustáns participa nun curso de primeiros auxilios impartido dentro do programa “Pensa en ti” que promove entre as entidades sociais da provincia a Deputación de Pontevedra. Para comprobar a boa marcha desta iniciativa lúdico-formativa o alcalde de Ponte Caldelas, Perfecto Rodríguez, e a deputada Ana Isabel Vázquez visitaron aos participantes neste curso e intercambiaron opinións sobre a idoneidade do programa.

O curso de primeiros auxilios é impartido por un monitor titulado que ao longo dun período formativo de 30 horas, repartidas en xornadas de dúas horas nas tardes dos sábados, vai mostrando aos alumnos participantes as distintas técnicas a realizar en caso de sufrir algún tipo de accidente ou imprevisto.

Os asistentes ao curso agradeceron a iniciativa ao Concello e á Deputación de Pontevedra ao tempo que mostraron por repetir a experiencia formativa a través da solicitude dun novo curso do amplo abano de especialidades que ofrece o programa “Pensa en ti” e cuxo prazo de entrega de solicitudes finaliza o próximo 2 de febreiro.

Perfecto Rodríguez e Ana Isabel Vázquez coincidiron en destacar o interese que esperta entre os colectivos sociais este programa que non só revitaliza os centros culturais e veciñais senón que serven de escusa para reunir os veciños en torno a unha actividade lúdica que ao mesmo tempo serve para aumentar o seu coñecemento sobre diversas cuestións.

Tamén destacaron a idoneidade do modelo escollido que facilita o acceso a este tipo de actividades que, doutro modo, as asociacións terían, por si mesmas, moi difícil o seu tratamento e posta en funcionamento.