Un cóengo da Catedral sorprendeu a Fernández Castiñeiras subtraendo diñeiro anos antes do roubo do Códice

Un cóengo do Cabido da Catedral de Santiago, o sacerdote Juan Filgueiras Fernández, sorprendeu o acusado do roubo do Códice Calixtino, José Manuel Fernández Castiñeiras, subtraendo diñeiro das colectas da capela da Corticela anos antes da desaparición do manuscrito medieval.

Filgueiras Fernández, que compareceu como testemuña no xuízo polo roubo do Códice Calixtino, explicou como nunha ocasión prestou as chaves da capela da Corticela, situada na Catedral, a Fernández Castiñeiras para que realizase “un traballo” nesta.

Pasados uns días, e a pesar de que o exelectricista lle devolvera a súa chave, o sacerdote sorprendeu a Fernández Castiñeiras dentro da capela, á que entrara cunha chave que, supostamente, tería duplicado.

“A porta estaba aberta, entrei e vin que o armario das colectas estaba aberto e que el estaba alí”, contou o cóengo, que lle dixo que se fose e llo comentou ao entón deán, José María Díaz, aínda que “non houbo denuncia”. Os feitos sucederon, confirmou, hai oito ou dez anos.

NON LLE DIXERON QUE FALTABA DIÑEIRO

O administrador da Catedral durante o roubo do Códice Calixtino, José Otero Outes, declarou tamén na terceira sesión deste xuízo, onde indicou que durante o seu mandato detectou que faltaban “documentos” do seu despacho, pero non diñeiro, e que o seu predecesor no cargo, Manuel Iglesias, “nunca” lle dixo que “faltase diñeiro” nas caixas fortes.

Durante a súa declaración, José Otero Outes indicou que, como administrador, seguiu “o mesmo proceso” do seu predecesor e utilizou un despacho que, como xa explicaron outras testemuñas, só el tiña a chave.

A pesar de que Manuel Iglesias detectara que faltaban fondos dende, polo menos, 2003, “nunca” comunicou ao novo administrador que “faltaba diñeiro”. “Da contabilidade anterior non me deron información, esa tíñaa o contable”, explicou Otero Outes.

Non obstante, Manuel Iglesias si lle dixo que había “unha sospeita” -sen concretala- e que por iso instalaran unha cámara no seu despacho, que lle identificou e lle explicou como gravaba. “Nunca comprobei se gravara ou non”, indicou.

UN PROBLEMA DE XESTIÓN

Das cantidades de diñeiro e documentos que durante anos faltaron na Catedral de Santiago tamén falou Daniel Lorenzo, cóengo da basílica dende 2009, que, recoñeceu, “botou en falta” numerosa documentación que debía estar no despacho do deán ou do administrador, aínda que o atribuíu a “un problema de xestión”.

Así mesmo, apuntou que falou co exadministrador Manuel Iglesias sobre os desaxustes detectados na contabilidade, aínda que o responsable económico da basílica lle quitou importancia indicando que dubidaba que as cantidades iniciais de diñeiro fosen correctas. “Cría que non podía entrar tanto diñeiro na Catedral”, explicou Daniel Lorenzo.

COA CHAVE POSTA

O investigador Xosé Manuel Sánchez, o home que deu a voz de alarma tras a desaparición do Códice, ratificou ante o xuíz, como xa fixo o exdeán, que a cámara de seguridade onde estaba o manuscrito e outros documentos permanecía “coas chaves postas” mentres o persoal se encontraba no arquivo.

Xosé Manuel Sánchez coñecía a Fernández Castiñeiras de “velo facendo arranxos polo arquivo”, aínda que non o viu en días anteriores á súa desaparición. Poucos días despois, non obstante, viuno entrar e saír da Catedral cunha mochila.

“Un día, cando estaba a falar por teléfono na porta, vino pasar cara á Catedral cunha mochila, entrou e saíu nun espazo moi breve. Chamoume a atención porque nunca o vira cunha mochila e pensei se el o tería collido por algún motivo e quería devolvelo e vendo o barullo botárase para atrás”, contou ante o tribunal.