“Quen gravou en San Sadurniño?” será a segunda estrea dixital do Chanfaina Lab

Guillermo Arias-Carbajal é o autor dunha curta que tenta reflectir dalgún xeito “a memoria de San Sadurniño”. Ou iso é o que asegura na presentación da peza protagonizada por el mesmo. Pero unha cousa é o que di o director e outra o resultado final, que nin sequera se aproxima ao concepto inicial e tira por outro camiño cargado de retranca que delega todo o mérito nunha cámara con vida propia. Un camiño, iso si, que non é froito da improvisación, senón dunha idea preconcibida e ben traballada… aínda que o autor nos queira convencer do contrario. “Quen gravou en San Sadurniño?” é a segunda peza que se estrea na plataforma falamedesansadurnino.org tralo exitoso arranque do venres pasado de “Café-bar Santos peluquería”, de Sonia Méndez.

Guillermo Arias-Carbajal Alonso (Madrid, 1983) formouse como fotógrafo na Coruña e como director e guionista na escola de cine Pedro Almodóvar de Alcorcón. O seu haber creativo conta con catro curtas e coa longametraxe “El Poema, El Cuadro, El Disco”, estreada no BAFICI de Bos Aires, ademais de varios videoclips.

Arias-Carbajal defínese como un “pallaso habitual, cineasta ocasional” que volca esa filosofía de vida en pezas como a presentada no Chanfaina Lab. Nela o director e guionista escusa a súa vagancia -falsa, como demostra a propia peza- por non ter feito nada para o proxecto no que participaron outros 20 creadores e creadoras do audiovisual galego. O autor bótalle humor ao asunto e conta a súa experiencia durante os días de rodaxe e o que supuxo para el entrar en contacto coa xente do “Novo cinema galego”. E ata aquí podemos contar porque, doutro xeito, estariamos destripando a curta.

“Quen gravou en San Sadurniño?” é a segunda curta que se estrea en falamedesansadurnino.org despois do exitoso arranque de proxeccións virtuais iniciado o venres pasado con “Café-bar Santos peluquería”, que xa anda preto das 400 reproducións en youtube. Unha peza dirixida por Sonia Méndez a quen, por certo, puidemos ver onte mesmo na serie de TVE “Cuéntame cómo pasó” interpretando a unha atracadora.

Dentro da programación de estreas semanais, o próximo venres tocaralle á curta de Juan Lesta e Belén Montero -Esferobite- “Balada Cover”, centrada nunha reconstrución do universo da Marquesa cos vimbios da poesía de Gabriel y Galán, a imaxe real e a composición dixital.

O Concello ten previsto facer pases das curtas do Chanfaina Lab no CPI e tamén lles ofrece esta posibilidade ás entidades do territorio. Aquelas que estean interesadas en programar unha proxección deben contactar co departamento de Cultura ou coa Rede CeMIT.