Programa do Entroido de Verín

Dende o 05 ao 22 de febreiro, as rúas e prazas de Verín acollerán a celebración do Entroido 2015, unha das celebracións máis orixinais, ancestrais e participativas de Galicia, que foi declarada Festa de Interese Turístico Nacional no ano 2009.

XOVES DE COMPADRES (05 DE FEBREIRO DE 2015)

Tras a primeira saída dos cigarróns no día de San Antón, comeza o Entroido 2015 co Xoves de Compadres. Tras cear nos restaurantes da localidade, á media noite os homes e mozos inician a celebración desta cita cun percorrido polas rúas Montemaior, praza García Barbón, Cruz, Mercé, Laureano Peláez, Irmáns Moreno, Deputación, Luis Espada, Lisa e praza García Barbón, onde se celebrará o xuízo e queima do Maragato. Durante este percorrido, os compadres irán acompañados do Carro do Meco, con bica e licor-café, e da música da Banda de Gaitas do Concello de Verín, o Folión dos Lampreas e da charanga Támega, para acabar a festa na praza ca Disco-Móvil Jorge.

SÁBADO DE CORREDOIRO (07 DE FEBREIRO DE 2015)

A Residencia de Anciáns Santa María acollerá a partir das 16 horas un baile de máscaras o Sábado de Corredoiro. Trátase da segunda vez que nesta residencia se organiza un acto en colaboración coa organización dos Festexos do Entroido, no que a animación musical correrá a cargo da Grupo Instrumental do Conservatorio Elemental de Música de Verín, que interpretará un repertorio composto por medio centenar de temas bailables variados que bandas populares e orquestras de verbena popularizaron na segunda metade do pasado século.

DOMINGO DE CORREDOIRO (08 DE FEBREIRO DE 2015)

A partir das 11.30 horas terá lugar a tradicional concentración de cigarróns na praza do Concello para, con posterioridade, recibir aos fregueses á saída das igrexas Parroquial e RR.PP. Mercedarios. Música nas prazas Maior e García Barbón, a cargo da charanga Támega, Disco-Móvil Gramola e da orquestra Cinema.

XOVES DE COMADRES (12 DE FEBREIRO DE 2015)

Desde as 11.45 horas terá lugar o Desfile Infantil de Entroido, no que os/as menores do Punto de Atención á Infancia do Concello de Riós, Kero-Kolo do Concello de Verín, Gardería Pinocho, CEIPs Amaro Refojo, Princesa de España, Castrelo do Val, Rodolfo Núñez de Vilardevós, Vendas da Barreira, Augusto Assia de A Mezquita, Medeiros, o Colexio Rural Agrupado Monterrei, Colexio María Inmaculada e o IES Taboada Chivite tomarán as rúas de Verín. Devandito desfile estará amenizado pola Banda de Gaitas do Concello de Verín e as charangas Támega, CBD, Solana, Ideal e Europa. O mesmo partirá, como todos os anos, do entroncamento da Canella Cega coa estrada de Cabreiroá, para percorrer as rúas Deputación, Luis Espada e Lisa, e finalizar nas prazas García Barbón e Maior.

Pola noite, as comadres encherán todos os restaurantes de vila, nos que cearán e bailarán ao ritmo da música das charangas Europa, Támega, CBD, Fuego e Ideal. A media noite, no Barrio de San Lázaro, a Raíña do Entroido recibirá a comitiva de Don Carnal, que descenderá polo Camiño Real acompañado da Banda de Gaitas do Concello de Verín e do Folión de Carracedo. Centenares de mulleres, e moitos homes disfrazados, percorrerán desde San Lázaro até as prazas Maior García Barbón, polas rúas San Lázaro, Luis Espada e Maior, onde o locutor de Cadena 100, Vidal López, caldeará o ambiente. Despois do saúdo da Raíña e Don Carnal, terá lugar a lectura do pregón que dará inicio o Entroido 2015, seguido da actuación da orquestra Marbella ata ben entrada a madrugada.

VENRES DE COMPADREO (13 DE FEBREIRO DE 2015)

Como nos últimos anos, o Capuchón e a Mascarita serán os uniformes oficiais que portarán os asistentes á festa durante esta xornada. A partir das 19 horas terá lugar a saída dos Escuadróns de Capuchóns e Mascaritas para percorrer diversas rúas e prazas da vila (desde o barrio de San Lázaro), con paradas estratéxicas para mollar a gorxa e encher o bandullo. Irán acompañadas en todo momento de dous Carros do Compadreo e das charangas Garrafón.com e Támega, e finalizará o percorrido napraza de Edesio Fuentes, onde a música acompañará a tradicional degustación de porco ao espeto. Música nas prazas García Barbón e Maior, a partir das 23 horas, con Disco-Móvil Camelot e a continuaciónverbena popular co grupo Tequila.

SÁBADO DE ENTROIDO (14 DE FEBREIRO DE 2015)

Ás 17 horas, sairán desde a praza do Concello a confraría do Cigarrón cara a praza da Mercé pola rúa Laureano Peláez. Na propia praza da Mercé celebrarase o emblemático “Bautizo do Cigarrón”, un acto solemne e onde serán investidos, por primeira vez, varios cigarróns. A continuación, estes novos cigarróns investidos presidirán unha marcha cara a praza do Cigarrón, onde se lle realizará unha homenaxe aos cigarróns que por calquera motivo non poden saír e deleitarnos co son das chocas. Durante a homenaxe colocarase unha pañoleta na estatua do Cigarrón e unha ofrenda floral que reivindica o sentimento do cigarrón. A banda sonora será a cargo das charangas Fuego, Europa e Támega, que actuarán durante toda a xornada, Disco-Móvil Jorge e as actuacións da orquestra Claxxón e o grupo Triunfo.

DOMINGO DE ENTROIDO (15 DE FEBREIRO DE 2015)

Día grande do Entroido. Pola mañá, unha descarga de foguetes despertará a todos os entroideiros, seguida da concentración de carrozas, comparsas, máscaras e cigarróns ás 12 horas no Barrio de San Roque para o gran Desfile de Entroido. A Banda de Gaitas do Concello de Verín e as charangas Támega, Ideal, Fuego e Solana serán os encargados de acompañar o desfile, percorrendo as rúas Luis Espada, Alameda e as prazas da Alameda e García Barbón. Na sesión vespertina e nocturna, continuará a animación musical polas rúas da vila a cargo de charangas e; nas prazas Maior e García Barbón, actuarán as orquestras Charleston Big-Band e Garibaldi.

LUNS FARELEIRO (16 DE FEBREIRO DE 2015)

Animación musical polas rúas de Verín a cargo da charanga Támega. Pola tarde, a partir das 16.30 horas, xogos infantís e inchábeis no Pavillón dos Deportes, onde os máis pequenos, que serán os protagonistas, deben ir disfrazados. Seguindo a tradición, DÍA DA FARELADA, con quilogramos e quilogramos de fariña, e a Disco-Móvil Gramola nas prazas García Barbón e Maior, e desde as 18.30 horas, baile e verbena popular nas prazas García Barbón e Maior coa orquestras París de Noia e La Oca.

MARTES DE ENTROIDO (17 DE FEBREIRO DE 2015)

Animación musical durante a mañá polas rúas de Verín. Ás 16.30 horas, concentración de carrozas, comparsas, máscaras e cigarróns no Barrio de San Roque, para media hora máis tarde, dar comezo ao Gran Desfile, que realizará o mesmo percorrido que o domingo. Todo iso amenizado polas charangas Támega, Vakapinta, CBD e Ideal que actuarán durante o día, o Folión do Tameirón e a Banda de Gaitas do Concello de Verín. A festa continuará, ata que o corpo aguante, nas prazas Maior e García Barbón coa actuación da orquestra Palladium e o grupo Aché.

SÁBADO DE PIÑATA (21 DE FEBREIRO DE 2015)

A partir das 17 horas no Centro Sociocomunitario de Verín, sesión de baile para usuarios/as a cargo da Grupo Instrumental do Conservatorio Elemental de Música de Verín, co que apurar as últimas horas para despedir o Entroido.

DOMINGO DE PIÑATA (22 DE FEBREIRO DE 2015)

Xantar popular de Piñata, para comparsas e carrozas, e a partir das 17 horas, música e baile nas prazas Maior e García Barbón, para finalizar o Entroido 2015.