Os socialistas denuncian altas temerarias en Urxencias do CHUO

A voceiro de Sanidade do PSdeG, Carmen Acuña, denunciou este xoves “altas temerarias” no Servizo de Urxencias do Complexo Hospitalario Universitario de Ourense (CHUO) para “desconxestionar a saturación” de pacientes.

Neste sentido, nunha nota de prensa, os socialistas acusan a Xerencia ourensana e o Servizo de Urxencias de estar “intimamente relacionados” e de contradicir “sistematicamente” os ingresos ordenados polos médicos.

Así, Acuña precisou que a Xerencia “revisa” os pacientes que ingresan en Urxencias, “totalmente desbordadas”, segundo engade, e que esta “só” busca “impedir” os ingresos dos enfermos para eliminar a “saturación” do centro. En concreto, remarcou que en Medicina Interna se atenden “máis de 300 ingresos”, unha cifra “imposible de xestionar”.

Por outra banda, a deputada socialista achacou o peche de “plantas enteiras” do hospital Piñor de Ourense á redución de persoal imposta polo presidente da Xunta, Alberto Núñez Feijóo. “Os picos de enfermos están a chegar e a planta permanece pechada”, expuxo.

Deste modo, indicou que a diminución do equipo se debe ás xubilacións “obrigadas” e á “falta” de reposicións e “novas” contratacións, uns feitos que, segundo advertiu Carmen Acuña, provocan “importantes disfuncións” na atención primaria.

Estas medidas, salientou, son as responsables de provocar, “co tempo”, o “incremento” dos ingresos en Urxencias e o “colapso do sistema”.

Finalmente, Acuña sentenciou que o Goberno galego “mente”, posto que “aseguraron” que ían reforzar o Servizo de Urxencias ante o pico de enfermos previsible por unha epidemia de gripe e non o fixeron. “Estamos a comprobar que se tratou doutra mentira”, lamentou.

APOIO Á “PROFESIONALIDADE”

En resposta a estas acusacións do grupo socialista, a Xerencia de Xestión Integrada eloxiou a “profesionalidade”, o “esforzo” e o “compromiso” dos profesionais.

Así, manifestou que os médicos responden “positivamente” ás peticións da dirección e dos responsables dos diferentes servizos para reincorporarse ao traballo. Deste modo, asegurou que “renuncian” ao seu período vacacional e permisos para “axilizar as atencións”.

En concreto, a Xerencia ourensana apuntou que, dende o inicio das festas de Nadal, os Centros de Saúde de Ourense, Puntos de Atención Continuada (PAC) e Servizos de Urxencias dos tres hospitais aumentaron a súa actividade.

Ao respecto, indicou que en “días puntuais” se “superaron” as medias anuais de atención diaria e que o “aumento” de atencións urxentes nos hospitais orixina un “incremento dos ingresos” e “maior” demanda de camas. “É algo que se está a asumir con normalidade”, expuxo.

Así mesmo, recalcou que este engrosamento responde a “unha normalidade estacional” que é “común” a todos os sistemas sanitarios do ámbito. Ademais, recordou que en Ourense está implantado un sistema de clasificación ou primeira valoración sanitaria, o cal permite valorar a urxencia e prioridade asistencial dos enfermos para “atender antes a quen máis o necesita”.