Enviar a un amigo
Opinar
ImprimirO tempo media de espera para un intervención cirúrxica no Chuac baixa a 74,4 días
O Complexo Hospitalario Universitario da Coruña (Chuac) reduciu o tempo medio de espera global para unha intervención cirúrxica, ao situarse en 74,4 días en 2014, fronte aos 76,1 do ano anterior, o que supón un día e medio menos.
Así o indicou, en rolda de prensa, o director de Procesos Asistenciais de Xerencia de Xestión Integrada da Coruña, Ramón Ares, que resaltou o “maior esforzo” que se está a facer na xornada ordinaria, o que permitiu incrementar o número de operacións e consultas.
Non obstante, o tempo medio de espera para pacientes con prioridade 1 aumentou en case dous días, ao pasar de 18,4 en 2013 a 20 días en 2014. Un incremento que Ares xustificou en que nesta patoloxía, xeralmente vinculada ao cancro, “non son un número moi elevado de pacientes, e se existen pequenas variacións no tempo de espera cambian a media”.
En canto ao número de intervencións, ao longo de 2014 realizáronse un total de 35.957 operacións, 204 máis que no ano 2013. Delas, 29.821 foron programadas, 1.170 máis que o ano pasado. O aumento de actividade en quirófano permitiu que o rendemento cirúrxico pasase do 76,06 ao 77,55 por cento.
En cifras globais, o número de pacientes que están á espera dunha intervención cirúrxica aumentou en 472, pasando dos 7.038 en 2013 a 7.510 en 2014.
OUTRAS AREAS
En canto ao número de ingresos, en 2014 realizáronse 40.279, o que supón 588 menos que no mesmo período do ano 2013, reducíndose a estanza media dos 9,12 aos 8,91 días.
Por outra banda, ao longo do ano 2014 o servizo de urxencias do complexo hospitalario atendeu 154.039, cunha media diaria de 422, diminuíndo a taxa de urxencias ingresadas un 0,56 por cento.
Na área de consultas, o Chuac realizou 1.127 primeiras consultas máis en 2014 que no ano anterior. Ares destacou que este aumento de actividade permitiu reducir o número de pacientes en lista de espera, pasando dos 27.800 en 2013 os 24.660 en 2014, o que supón 3.140 pacientes menos.
Sobre as vías rápidas, o director de Procesos Asistenciais de Xerencia de Xestión Integrada da Coruña resaltou o descenso no tempo medio para acceder a elas. Así, subliñou a de cancro de pulmón, que se reduciu en máis de seis días, pasando dos 6,2 en 2013 aos cero días en 2014.
